Apple we Google kompaniýalary köp ýyllyk hyzmatdaşlyk şertnamasyny baglaşdylar. Bu ylalaşygyň çäklerinde Gemini emeli aň modeli Siri ses kömekçisiniň täzelenen wersiýasyny döretmek üçin ulanylar. Siri-niň täze görnüşini şu ýylyň ahyryna çenli tanyşdyrmak meýilleşdirilýär.
Kompaniýalaryň bilelikdäki beýanatynda şeýle diýilýär: “Dykgatly seljermelerden soň, Apple Google-yň emeli aň tehnologiýasynyň ‘Apple Foundation Models’ üçin iň netijeli binýady üpjün edýändigini anyklady. Apple Intelligence ulgamy pudakdaky öňdebaryjy gizlinlik standartlaryny saklap galmak bilen, Apple enjamlarynda we hususy bulutda (private cloud) işlemegini dowam eder”.
Ylalaşygyň maliýe şertleri anyk mälim edilmedi. Emma Bloomberg-iň habar bermegine görä, Apple Gemini-den peýdalanmak üçin Google-a ýylda takmynan 1 milliard dollar töläp biler. Google-yň modeliniň bildirişleri, web sahypalary we tekstleri gysgaça mazmuna getirmek, şeýle hem Siri-niň buýruklaryny meýilleşdirmek (planning) üçin jogapkär bolmagyna garaşylýar.
Mundan öň Apple-iň beýleki mümkinçilikleri, şol sanda OpenAI we Anthropic modellerini birleşdirmek, hatda Mistral AI we Perplexity bilen hyzmatdaşlyk etmek mümkinçiliklerini hem göz öňünde tutandygy bellenilýär.
Bu ylalaşyga telekeçi Ilon Mask açyk garşy çykdy. Ol özüniň “X” (öňki Twitter) hasabynda: “Android-e we Chrome-a eýeçilik edýändigini göz öňünde tutsaň, bu Google-yň elinde häkimligiň esassyz jemlenmegine meňzeýär” diýip ýazdy. Özüniň xAI atly emeli aň kompaniýasy bolan milliarder iki kompaniýany hem monopoliýa garşy kanunlary bozmakda aýyplady.
Şeýle-de bolsa, Google bilen hyzmatdaşlyk beýleki AI integrasiýalaryna päsgel bermeýär. Apple eýýäm OpenAI bilen işleşýär. Kompaniýanyň baş direktory Tim Kuk “Apple Intelligence” ekoulgamynyň wagtyň geçmegi bilen has-da giňelip biljekdigini mälim etdi.
Kompaniýa emeli aň bölüminde kadrlar üýtgeşmesini hem amala aşyrdy: Jon Jannandrea ýolbaşçy wezipesinden gitdi we täzelenen Siri üçin jogapkärçilik öň Vision Pro taslamasyny dolandyran Maýk Rokwele ynanyldy.
