Akylly telefon bazarynyň innowasion öndürijileriniň biri bolan Oppo orta-ýokary derejeli meşhur seriýasynyň täze wekilleri — Oppo Reno 16 we Reno 16c modellerini resmi taýdan yglan etdi.
Giň model hataryna eýe bolan täze seriýadan ilkinji tapgyrda hut şu iki modeliň jikme-jik maglumatlary resmi metbugat beýanaty arkaly aýan edildi. Akylly telefon pudagynda ilkinji gezek äýnek ulanmazdan üç ölçegli çuňluk duýgusyny döredýän HoloVerse 3D dizaýn dilini ulanýan bu enjamlar diňe bir özüne çekiji daşky görnüşi bilen däl, eýsem harby derejedäki berkligi bilen hem ünsi çekýär. Awiasiýa pudagynda ulanylýan alýumin çarçuwa bilen berkidilen seriýa, korpusyna ýerleşdirilen we sazlap bolýan AI Snap Key emeli aň düwmesi arkaly ChatGPT, Gemini we Perplexity ýaly meşhur emeli aň hyzmatlaryna bir düwme bilen girmäge mümkinçilik berýär.
Seriýanyň global tanyşdyrylyşy 25-nji iýunda geçiriler, enjamlaryň bolsa iýul aýynyň başlarynda köp bazarlarda satuwa çykarylmagyna garaşylýar.
Äýneksiz 3D tejribesi: HoloVerse dizaýny
Oppo Reno seriýasynda her nesilde ünsi yzky gapagyň bezegine gönükdirýärdi, Reno 16 maşgalasy bilen bolsa bu ugur düýbünden täze derejä çykaryldy. Esasan hem seriýanyň “Starry White” (Ýyldyzly ak) reňk görnüşinde ulanylýan HoloVerse 3D dizaýny smartfon dizaýnynda täze döwrüň başlangyjy hökmünde görkezilýär. Iki gatly optiki gurluşyň we onuň aşagyna takyk ýerleşdirilen millionlarça mikrolinzalaryň kömegi bilen telefona serediş burçuňyza we ýagtylygyň düşüş ugruna baglylykda yzky gapagyň içinde edil bir planeta ýerleşen ýaly üç ölçegli çuňluk täsiri emele gelýär.
Enjamdaky ýüzüp duran ýalpyldy effektleri we çuňluk duýgusyny güýçlendirýän täze kamera halkasy dizaýny bu wizual baýlygy has-da artdyrýar. Ulanyjylar ýyldyzly ak reňkden başga-da Twilight Violet (Alagaraňky menekşe) we Stellar Purple (Ýyldyz menekşe) reňk görnüşlerini saýlap bilerler. Dizaýnyň getiren bu nepisligi korpusyň berkligi we suw geçirmezligi bilen utgaşýar. Oppo Reno 16 we Reno 16c modelleri IP66, IP68, IP69 we hatda senagat derejesindäki IP69K sertifikatlaryna eýedir. Bu sertifikatlar telefonuň diňe suwa gaçmaga däl, eýsem ýokary basyşly we ýokary temperaturaly suw akymlaryna hem çydamlydygyny aňladýar. Adaty plastik çarçuwaly bäsdeşlerinden tapawutlylykda Reno 16 modelinde awiasiýa standartlaryna laýyk alýumin çarçuwa ulanylýar. Bu metal garyndy telefonuň gaçmalara we egrelmelere garşy berkligini ep-esli ýokarlandyrýar.
Inçe korpusda ýokary ýagtylykly AMOLED ekranlar
Ekran we ölçegler babatda iki model hem bir elde amatly ulanylyş bilen giň ekran tejribesiniň arasynda oňat deňagramlylygy üpjün edýär. Adaty Oppo Reno 16 modelinde 6,32 dýuýmlyk Full HD+ durulykdaky AMOLED ekran ýerleşdirilýär. Diňe 1,6 mm galyňlykdaky çarçuwalary sebäpli ekran-korpus gatnaşygy 93,4 göterime ýetýär. 120 Gs täzeleniş ýygylygy bilen işleýän bu ekran göni Gün şöhlesiniň astynda 1800 nit derejä çenli ýagtylyk berýär.
Has uly ekran isleýänler üçin niýetlenen Oppo Reno 16c modelinde bolsa 6,57 dýuýmlyk Full HD+ durulykdaky we 120 Gs täzeleniş ýygylykly AMOLED ekran ulanylýar. Bu model hem açyk howada ulanylanda 1400 nit derejä çenli ýagtylyk hödürläp, ekrandaky maglumatlaryň aýdyň görünmegini üpjün edýär. Ösen kamera ulgamlaryna we berk korpus gurluşyna garamazdan ykjam gurluş saklanyp galýar. Reno 16 modeliniň galyňlygy 8,22 mm, agramy 182 gram bolsa, Reno 16c modeliniň galyňlygy 8,44 mm, agramy bolsa 195 gramdyr.
Emeli aňy dolandyrýan fiziki düwme: AI Snap Key
Reno 16 seriýasynyň iň uly täzeliklerinden biri korpusyň gapdalynda ýerleşdirilen AI Snap Key atly fiziki gysga ýol düwmesidir. Ulanyjylar bu akylly düwmäni öz isleglerine görä doly sazlap bilýärler. Bir düwme bilen kamerany işe girizmek, el çyrasyny ýakmak, ses ýazgysyny başlatmak ýa-da dessine terjime tertibini işjeňleşdirmek mümkin. Emma bu düwmäniň esasy güýji Oppo kompaniýasynyň AI Mind Space adyny beren täze emeli aň platformasy bilen utgaşykly işlemeginde ýüze çykýar.
AI Snap Key düwmesini basyp saklanyňyzda ulgam Google Gemini, ChatGPT we Perplexity ýaly dünýäniň öňdebaryjy emeli aň hereketlendirijilerini bir ýere jemläp hyzmatyňyza hödürleýär. Ekranda okaýan tekstiňizi gysgaltmak, sesli buýruklar arkaly internetde çuňňur gözleg geçirmek, maglumatlary arhiwlemek we soňra olary tiz tapmak ýaly amallar bu düwme arkaly has amatly bolýar.
Oppo kompaniýasynyň täze smartfon seriýasy bilen birlikde Oppo Bubble atly täze akylly aksessuarynyň we ýokary ses hili bilen tapawutlanýan Enco Air 5 simsiz gulaklygynyň hem tanyşdyrylmagyna garaşylýar. Enjam üpjünçiligini, emeli aňy we özüne çekiji dizaýny birleşdirýän täze Reno maşgalasy orta derejeli smartfon bazaryndaky bäsleşigi has ýokary derejä çykarýar.
