Google şu gün Gemini 3.6 Flash, Gemini 3.5 Flash-Lite hem-de kiberhowpsuzlyga ýöriteleşdirilen Gemini 3.5 Flash Cyber modellerini resmi taýdan hödürledi. Kompaniýanyň bellemegine görä, bary-ýogy iki aý ozal tanyşdyrylan Gemini 3.5 Flash modeliniň ornuny eýeleýän täze Gemini 3.6 Flash has pes çykdajylary, az token sarp edişini we gurallary has ygtybarly ulanmagy üpjün edýär.
Täze modellerden işläp düzüjiler Gemini API we Google AI Studio arkaly peýdalanyp bilýärler. Ahyrky ulanyjylar bolsa Gemini programmasynda Gemini 3.6 Flash modeline elýeterlilik aldylar.
Gemini 3.6 Flash: has az token, has ýokary öndürijilik
Gemini 3.6 Flash ýokary tizlik bilen ösen logiki pikirleniş mümkinçilikleriniň arasynda deňagramlylygy üpjün edýän Google-yň esasy modeli hökmünde görkezilýär.
Artificial Analysis Index tarapyndan berlen maglumatlara görä, täze model Gemini 3.5 Flash bilen deňeşdirilende çykýan tokenleriň mukdaryny 17% azaldýar. DeepSWE synagynda bolsa token tygşytlylygy 65%-e çenli ýetýär.
Mundan başga-da, model köp ädimli meseleleri ýerine ýetirende has az pikirleniş ädimini we az gural çagyryşyny ulanýar.
Bahasy hem peseldi
Google täze model üçin aşakdaky nyrhlary kesgitledi:
- 1 million giriş tokeny – 1,50 ABŞ dollary
- 1 million çykyş tokeny – 7,50 ABŞ dollary
Şeýlelikde kompaniýa diňe bir her token üçin çykdajyny däl, eýsem emeli aň agentleriniň meseläni çözmek üçin ýerine ýetirýän umumy amallarynyň sanyny hem azaltmagy maksat edinýär. Bu çemeleşme aýratyn-da korporatiw emeli aň agentleri we uly göwrümli programma ýazmak işleri üçin möhüm ähmiýete eýedir.
Öndürijilik görkezijileri ep-esli ýokarlandy
Täze model birnäçe synaglarda öňki nesilden has ýokary netijeleri görkezdi:
- DeepSWE: 37%-den 49%-e
- MLE Bench: 49,7%-den 63,9%-e
- OSWorld-Verified: 78,4%-den 83%-e
- GDPval-AA v2: 1349 baldan 1421 bala
Google täze modeliň gereksiz kod üýtgetmelerini we gaýtalanýan ýerine ýetiriş aýlawlaryny hem ep-esli azaldýandygyny belleýär.
Gemini 3.5 Flash-Lite sekuntda 350 token öndürýär
Gemini 3.5 Flash-Lite pes gijikdirme we ýokary öndürijilik talap edýän işläp düzüjiler üçin niýetlenendir.
Artificial Analysis maglumatlaryna görä, model sekuntda 350 çykyş tokenyny öndürmäge ukyply.
Nyrhlary:
- 1 million giriş tokeny – 0,30 ABŞ dollary
- 1 million çykyş tokeny – 2,50 ABŞ dollary
Bu model esasan:
- resminamalary işlemek,
- gözleg agentleri,
- maglumatlary toparlara bölmek,
- köp sanly kiçi göwrümli haýyşlary gaýtadan işlemek
ýaly hyzmatlar üçin amatly hasaplanýar.
Synag netijeleri
- Terminal-Bench 2.1: 31%-den 54%-e
- GDM-MRCR v2: 60,1%-den 72,2%-e
- GDPval-AA v2: 642 baldan 1140 bala
- SWE-Bench Pro: 54,2%
- OSWorld-Verified: 74%
Google-yň bellemegine görä, Gemini 3.5 Flash-Lite käbir kodlaşdyrmak we agent synaglarynda hatda has ýokary derejeli Gemini 3 Flash modelinden hem öňe geçýär.
Şeýle hem işläp düzüjiler modeliň pikirleniş derejesini ýerine ýetirilmeli meselä görä sazlap bilýärler. Pes derejeler gijikdirilmäni we çykdajyny azaldýar, ýokary derejeler bolsa çylşyrymly meseleler üçin has köp hasaplaýyş kuwwatyny berýär.
Google mundan başga-da kompýuter dolandyryş guralyny göni Gemini 3.5 Flash-Lite modeline goşdy. Şeýlelikde model brauzerlerde, mobil programmalarda we iş stoly interfeýslerinde işleýän agentleriň esasy hökmünde ulanylyp bilýär.
Flash Cyber – gowşaklyklary tapýar we kody düzedýär
Gemini 3.5 Flash Cyber modeli Gemini 3.5 Flash esasynda döredilip, kiberhowpsuzlyk gowşaklyklaryny ýüze çykarmak, barlamak we düzetmek üçin ýörite işlenip taýýarlandy.
CodeMender ulgamy bir howpsuzlyk meselesini birnäçe Flash Cyber agentine seljerdirýär, soňra olaryň netijelerini ýeke-täk hasabatda birleşdirýär.
Google-yň maglumatlaryna görä, model CyberGym synagynda has uly emeli aň modellerine ýakyn netijeleri görkezýär, şol bir wagtyň özünde bolsa az token sarp edýär.
Şeýle-de bolsa, Flash Cyber modeli hyýanatçylykly ulanylmak howpy sebäpli köpçülige hödürlenmez. Google ony diňe döwlet edaralary we ygtybarly hyzmatdaşlar bilen bilelikde geçirilýän çäkli CodeMender synag maksatnamasynyň çäklerinde ulanar.
Ulanylyşy giňelýär
Gemini 3.6 Flash we Gemini 3.5 Flash-Lite häzirki wagtda:
- Gemini API
- Google AI Studio
- Android Studio
- Gemini Enterprise Agent Platform
arkaly elýeterlidir.
Şeýle hem:
- Gemini 3.6 Flash – Google Antigravity we Gemini Enterprise hyzmatlaryna goşuldy;
- Gemini 3.5 Flash-Lite bolsa Google Search ulgamyna tapgyrlaýyn ornaşdyrylýar.
Gemini programmasynyň ähli ulanyjylary model menýusyndan Gemini 3.6 Flash görnüşini saýlap bilýärler.
Google mundan başga-da Gemini 3.5 Pro modeliniň hyzmatdaşlar bilen synaglarynyň dowam edýändigini hem-de Gemini 4 modeliniň öňünden taýýarlyk (pre-training) tapgyrynyň başlanandygyny mälim etdi.
