Hytaý 2025-nji ýylda öz taryhynda ilkinji halas ediş kosmos missiýasyny uçurdy

2025-nji ýylyň 25-nji noýabrynda ýerli wagt boýunça sagat 12:11-de Hytaý gyssagly ýagdaýda “Şençžou-22” kosmos gämisiniň “Týangun” orbital stansiýasyna uçuşyny amala aşyrdy. Gämi “Çançžen-2F” raketasynda Szýusýuan kosmodromyndan ekipažsyz uçup, orbita üstünlikli çykdy.

Uçuş Hytaýyň taryhynda ilkinji halas ediş kosmos missiýasy boldy diýip, South China Morning Post ýazýar.

Gäminiň maksady kosmos zibiliniň ýa-da mikrometeoritiň urgusyndan soň zeper ýeten we ekipažyň yzyna gelmegi üçin howpsuz däl hasaplanýan “Şençžou-20” enjamyny çalyşmakdyr. “Çançžen-2F” raketasy şeýle ýagdaý üçin kosmodromda ýokary taýýarlyk derejesinde durdy, bu hem uçuşy gysga möhletde amala aşyrmaga mümkinçilik berdi.

Öňki ekspedisiýanyň ekipažy “Şençžou-20” gämisiniň illýuminatorynda jaýryklaryň peýda bolandygy üçin bu gämide Ýere dolanyp bilmedi. 14-nji noýabrda aşak düşmek üçin kosmonawtlar täze ekipažyň gämisini – “Şençžou-21-i” ulanyp, nobatçy ekipažy gämisiz goýdy. “Şençžou-22” gämisiniň uçurylmagy bu ýagdaýy düzeder.

“Şençžou-22-niň” bortunda stansiýa 600 kg töweregi ýük, şol sanda azyk we enjam iberildi. Zeper ýeten “Şençžou-20” gämisi tejribeler üçin ulanylar, şondan soň uçarmansyz režimde Ýere gaýtarylar. Ätiýaçlyk gämisini göterýän raketanyň bortunda gorag nyşany hökmünde Beýik Hytaý diwarynyň simwolik şekili, şeýle-de gyssagly herekete taýýarlygy aňladýan ýaý we oklar bardy.