Şanhaýda geçirilen 2025-nji ýyldaky Dünýäniň täzeçil işläp düzüjileriniň sammitinde hem-de Halkara Emeli Aň bäsleşiginde, robotlaryň dürli ugurlarda hakyky durmuş şertlerinde ulanylyşy, ýagny senagat önümçiliginde, öý hojalyklarynda, adatdan daşary ýagdaýlardaky halas ediş işlerinde, hem-de lukmançylyk kömegini bermekde ulanylyşy görkezildi. Adaty sergilerden tapawutlylykda, bu çäre hakyky durmuş şertlerine esaslanan bäsleşiklere ünsi jemledi we ýurduň dürli künjeklerinden gelen 100-den gowrak emeli aňly robotlar toparynyň gatnaşmagy giň köpçülikde uly gyzyklanma döretdi.
Üç gün dowam eden bu çäre alty sany tema boýunça we sekiz sany hakyky durmuş şertlerine esaslanan 19 sany ýöriteleşdirilen bäsleşikleri öz içine aldy. Bu bäsleşiklerde robotlaryň adam durmuşyna giňden ornaşdyrylmagynyň mümkin bolan ugurlary görkezildi. Adatdan daşary ýagdaýlarynda halas ediş meýdançasynda 10 sany topar howply şertlerde üpjünçilik serişdelerini daşamak, çylşyrymly ýerlerden geçmek we binalara çykmak boýunça robotlaryň mümkinçilikleri synagdan geçirildi. Eminler saýlanyp alnan durmuş şertleriniň hakyky halas ediş işleriniň talaplaryna laýyk gelýändigini we robotlaryň adatdan daşary ýagdaýlarda işleýiş ukybynyň möhüm ähmiýete eýedigini bellediler.
Senagat materiallaryny daşamak boýunça bäsleşiklerde robotlar önümçilik sehlerinde ýumuşlary ýerine ýetirdiler. Bu ýerde robotlaryň iş öndürijiligine, işleri akylly meýilleşdirmegine, uzak wagtyň dowamynda durnukly işleýşine hem-de päsgelçilikleri ýeňip geçmek ukyplaryna baha berildi. Bir robot iki eli bilen 30 kilogram çenli ýüki götermegi başarýandygyny, uzak wagtlap üznüksiz işläp bilýändigini görkezdi.
Geljekde robotlar hyzmat ediş pudagynda giňden ulanylar. Häzirki wagtda sargyt edilen iýmiti eltip gowşurmak, egin-eşikleri eplemek, gül çemenlerini bogmak we lukmançylyk hyzmatlaryny ýerine ýetirmek ýaly dürli ugurlarda robotlaryň başarnyklaryny synap görmek maksady bilen köp sanly bäsleşikler geçirilýär.
