Ilon Mask: «Ine ol, dünýädäki iň akylly emeli aň – Grok 3, indi mugt elýeterli (serwerlerimiz ereýänçä). Grok 3-i şu wagt synap görüň» — diýip, «xAI» startapy X sosial torunda beýan etdi.
Täze emeli aň modeli pikirlenmek, matematiki meseleleri çözmek, kompýuter kodlaryny ýazmak, bilim we görkezmeleri ýerine ýetirmek bilen baglanyşykly meselelerde bäsdeşlerinden has güýçli. Kompaniýanyň berýän maglumatlaryna görä, Grok 3 birnäçe synagda ýokary netijeleri görkezdi. «Chatbot Arena» platformasynda bu model Elo reýtinginde 1402 bal toplady. Ol bu görkezijisi bilen OpenAI GPT-4o (1377 bal) we Google Gemini 2.0 (1385 bal) ýaly modelleri yzda galdyrdy.
Grok 3 iki sany güýçli funksiýa bilen hem üpjün edildi: «DeepSearch» we «Think». DeepSearch – bu maglumatlary çalt seljerip, gapma-garşylykly hakykatlar we jedelli çekişmeler barada pikirlenip, çylşyrymly ýagdaýlardan dogry netijeleri çykaryp bilýän güýçli akylly agentdir. Think bolsa – emeli aňy has kämilleşdirýän tehnologiýadyr. Bu funksiýanyň kömegi bilen Grok 3 meseleleri çözmek üçin öz strategiýalaryny kämilleşdirmegi, yzyna gaýdyp ýalňyşlaryny düzetmegi we çözgüt tapmak üçin dürli usullary synap görmegi öwrendi.
«Edil adam ýaly, ol hem çylşyrymly meseläni çözýän mahaly birnäçe sekuntdan birnäçe minuda çenli pikirlenip biler, köplenç dürli çemeleşmeleri gözden geçirer, öz çözgüdüni barlar we meseläniň talaplaryny takyk ýerine ýetirmegiň ýollaryny seljerer» — diýip, «xAI» bu funksiýa barada düşündiriş berdi.
Häzirki wagtda Grok 3 ykjam goşundy hökmünde, web wersiýasy arkaly hem-de X platformasynda elýeterli. Şeýle-de «xAI» ýakyn wagtda bu emeli aň modeline API arkaly hem girip boljakdygyny mälim etdi. Ulanyjylar hem standart Grok 3 modelini, hem-de DeepSearch arkaly kämilleşdirilen wersiýasyny täze API arkaly ulanyp bilerler.
