LG CLOiD roboty barada täze maglumatlar peýda boldy. Kompaniýa bu roboty 6-9-njy ýanwar aralygynda Las-Wegasda geçirilýän CES 2026 halkara sergisinde tanyşdyrdy.
CLOiD LG-niň hojalyk robototehnikasyny ösdürmekdäki täze tapgyryny alamatlandyrýar. Dürli öý işlerini ýerine ýetirmek üçin döredilen bu enjam gündelik durmuşy has amatly edip, akylly öýi dolandyrmagy ýeňilleşdirer diýlip garaşylýar.
Kompaniýa CLOiD-i şahsy öý kömekçisi hökmünde görkezýär we ol “Zähmet talap etmeýän öý, ýokary hilli wagt” diýen konsepsiýany özünde jemleýär. Robotyň gündelik hojalyk hysyrdylarynyň bir bölegini öz üstüne almagyna garaşylýar, bu bolsa ulanyjylara dynç almaga we birek-birek bilen aragatnaşyk saklamaga has köp wagt tygşytlamaga mümkinçilik berer. Şeýle hem, bu taslama LG-niň akylly tehnologiýalar arkaly öý işleriniň möçberini azaltmak baradaky uzak möhletli maksadyna laýyk gelýär.
Robot ykjam ölçeglerde bolup, häzirki zaman öýleri üçin niýetlenendir. Ol her birinde ýedi erkinlik derejesi bolan iki sany manipulýator (el) we her elinde bäş sany hereketli barmak bilen enjamlaşdyrylan. Bu bolsa oňa takyk we kämil hereketleri amala aşyrmaga mümkinçilik berýär.
Korpusynyň ýokarky böleginde hasaplaýyş moduly, ekran, kamera, dinamikler we sensorlar ýerleşdirilen. CLOiD emeli aň tehnologiýasyny ulanyp, daş-töweregini seljerýär, sesli aragatnaşyk saklaýar we wagtyň geçmegi bilen eýesiniň endiklerine uýgunlaşýar.
