Türkmenistanda emeli aň ulgamyny düzgünleşdirmek üçin kadalaşdyryjy-hukuk binýady döretmek boýunça işler durmuşa geçiriler. Ministrler Kabinetiniň düýn — 2026-njy ýylyň 23-nji ýanwarynda geçirilen mejlisinde emeli aň tehnologiýalaryny ulanmagyň kadalaryny işläp taýýarlamak, şeýle hem degişli subýektleriň özara gatnaşyklaryny düzgünleşdirmek baradaky teklip hödürlenildi. Bu barada TDH habar berýär.
Mejlisde beren hasabatynda wise-premýer Mämmethan Çakyýew, hususan-da, bu ugurda döwlet edaralarynyň ygtyýarlyklaryny, hukuklaryny we borçlaryny kesgitlemegi teklip etdi. Onuň aýtmagyna görä, edaralaryň jogapkärçiligine, emeli aň önümleri we tehnologiýalary üçin milli ülňüleri hem-de tehniki kadalaşdyryjy namalary taýýarlamaga aýratyn üns berler.
Wise-premýer döwlet Baştutanymyzyň garamagyna degişli teklibi hödürledi.
Prezident Serdar Berdimuhamedow hasabaty diňläp, ýurdumyzda sanly ykdysadyýeti ösdürmek, pudaklara innowasion tehnologiýalary ornaşdyrmak boýunça netijeli işleriň durmuşa geçirilýändigini, şunuň bilen baglylykda, emeli aň tehnologiýalaryny ösdürmegiň, bu ugurda halkara hyzmatdaşlygy ýola goýmagyň möhüm bolup durýandygyny aýtdy. Ol bu başlangyjy goldap, wise-premýere degişli işleri geçirmegi tabşyrdy.
