Xiaomi-niň täze flagmanlary bolan Xiaomi 17 Pro we 17 Pro Max smartfonlarynyň her biriniň aktiwleşdiriliş sany bir millionlyk sepgitden ýokary geçdi. Bu barada hytaýly meşhur insaýder “Digital Chat Station” habar berdi.
Onuň maglumatlaryna görä, ýakynda hödürlenen smartfonlaryň arasynda diňe üç model: Xiaomi 17 Pro seriýasynyň iki enjamy hem-de Huawei Mate 80 smartfony milliondan gowrak aktiwleşdiriş görkezijisini gazanmagy başardy.
Xiaomi 17 Pro seriýasy soňky döwürde çykan ähli flagman modelleriniň arasynda iň ýokary meşhurlyga eýe boldy. “Xiaomi Group”-yň prezidenti Lu Weýbin sosial ulgamlarda Xiaomi 17 seriýasynyň kompaniýanyň bütin taryhyndaky iň köp satylan telefon seriýasydygyny aýratyn belledi.
Täze flagmanlaryň iň esasy aýratynlygy — olaryň özboluşly dizaýnydyr. Smartfonlaryň arka panelinde doly derejeli ikinji displeý hökmünde işleýän goşmaça ekran ýerleşdirilen. Bu ekranda sagady, dürli awatarlary we wirtual öý haýwanlaryny görkezip bolýar. Şeýle-de, ikinji ekranda habarnamalary okamak we möhüm bellikleri berkidip goýmak mümkinçiligi bar.
Arka tarapdaky ekran surata düşürilende hem uly ýeňillikleri döredýär: ol esasy kameradan alynýan şekili hakyky wagtda (real-time) görmäge mümkinçilik berýär. Bu bolsa, başga bir adam sizi surata düşürýän wagty kadryň dogry düşmegini dolandyrmaga kömek edýär.
