Fransiýanyň Il-de-Frans sebitinde ilkinji şäher asma ýoly resmi taýdan açyldy. Ol Ýewropada iň uzyn şäher asma ýoly boldy. Câble C1 adyny alan bu ýol Wal-de-Marn departamentinde Kreteý we Wilnýow-Sen-Žorž şäherlerini birleşdirýär diýip, BFTMV habar berýär.
Ýoluň uzynlygy 4,5 kilometre barabar. Täze transportyň netijesinde ýol wagty, takmynan, 40 minutdan (awtobusda) 18 minuta çenli azalar. Câble C1 her gün 11 müň töweregi ýolagçyny gatnadyp, dört şähere: Kreteýe, Walentona, Limeý-Brewana, şeýle-de Wilnýow-Sen-Žorža hyzmat eder.
Taslamanyň bahasy 132 mln ýewro boldy we Fransiýanyň hökümeti, Il-de-Frans sebiti we Wal-de-Marn departamenti tarapyndan maliýeleşdirildi. Asma ýolunda 20-30 sekunt wagt aralygy bilen 105 sany on orunlyk kabina hereket eder. Kabinalar hereketi çäkli raýatlary, welosipedçileri we çaga arabalaryny hem göz öňünde tutup döredildi, zerur bolan ýagdaýynda olaryň hereket tizligini-de sazlap bolýar.
