Ýakynda, Türkmenistanyň Prezidentiniň ýanyndaky Döwlet gullugy akademiýasynyň «Konstitusion hukuk» magistrlik okuwynyň ilkinji uçurymlary okuwyny tamamlady. Bu waka mynasybetli dabaraly duşuşyk geçirildi. Döwlet synaglaryndan üstünlikli geçip, ylmy-barlag diplom işlerini goran 9 uçurym arzyly diploma eýe boldy. Belläp geçsek, uçurym Mähri Babaýewa Döwlet gullugy akademiýasynyň magistrleriniň arasynda tapawutlanan diploma mynasyp bolan ilkinji okuwçy boldy.
Türkmenistanyň Prezidentiniň ýanyndaky Döwlet gullugy akademiýasynyň «Konstitusion hukuk» magistraturasynyň okuw möhleti 1,5 ýyl bolup, konstitusiýa hukugy jähetinden iň gowy halkara hem innowasion milli tejribäni göz öňünde tutmak bilen işlenip düzülen 12 hökmany we 2 sany saýlama okuw derslerini öz içine alýar. Okuw meýilnamasy 4 esasy ugra: leksiýa we seminar okuwlaryna; talyplaryň özbaşdak okamagyna; ylmy-barlag işlerine; önümçilik tejribeligine esaslanýar.
Bu ýerde, «Türkmenistanyň konstitusion hukugy», «Döwlet we hukuk nazaryýeti», «Türkmenistanyň döwlet we hukugynyň taryhy», «Edara ediş kanuny», «Zähmet kanuny», «Maliýe hukugy», «Halkara hukuk» ýaly dersler boýunça sapaklar geçilýär. Bu dersler bilen bir hatarda «Hukuk filosofiýasy», «Deňeşdirme kanuny», «Ýerli öz-özüňi dolandyryş kanuny» ýaly täze, täzeçillik okuw dersleri işlenip düzüldi we maksatnama goşuldy.
2021-nji ýylda Döwlet gullugy akademiýasy tassyklanan okuw meýilnamasynyň esasynda üç sany magistrlik maksatnamasy boýunça maksatly kabul edişligi geçirendigini hem aýdylanlara goşmak gerek: «Sanly dolandyryş» – okuwyň dowamlylygy 1 ýyl, «Konstitusion hukuk» – okuwyň dowamlylygy 1,5 ýyl we «Döwlet dolandyryşy» – okuwyň dowamlylygy 2 ýyl.
