Berkarar döwletiň täze eýýamynyň Galkynyşy döwründe ýurdumyzda bilim ulgamynyň ösdürilmegine aýratyn ähmiýet berilýär. Ýaş nesliň dünýägaraýşyny giňeltmek, döredijilikli pikirlenmesini, döwrebap aň ukybyny kemala getirmek bilen baglanyşykly giň gerimli işler alnyp barylýar. Bu babatda başlangyç synplarda okadylýan matematika dersi ýurdumyzyň bilim syýasatynyň möhüm düzümleriniň biridir.
Matematika diňe bir sanlar we amallar hakynda däl, eýsem, akyl ýetiriş, seljeriş, sebäp-netije gatnaşyklaryny açyp görkezýän ylmy binýatdyr. Çagalaryň irki ýaşdan logiki pikirlenme endiklerini ösdürmek, olaryň geljekde ähli ugurlarda üstünlik gazanmagynyň berk binýadyny döredýär. Başlangyç synplarda matematika sapaklaryny döwrebap usullar arkaly okatmak, okuwçylaryň zehini işjeňleşdirýär, analiz-sintez ukyplaryny güýçlendirýär we aýratyn pikir ugruny kemala getirýär.
Ýurdumyzyň başlangyç bilim ulgamynda matematikanyň mazmuny döwletiň ileri tutýan ugurlary bilen utgaşyklykda kämilleşdirilýär. Sapaklarda interaktiw usullaryň, sanly serişdeleriň, modelleriň we meňzetmeli oýunlaryň ulanylmagy okuwçylaryň höwesini artdyrýar we olaryň logiki-düşünje gurluşyny berkidýär.
Matematika arkaly okuwçylar çözgüt tapmak, pikirini esaslandyrmak, mümkin bolan wariantlary deňeşdirmek ýaly öwgitli ukyplary özleşdirýärler. Bu bolsa geljekde ýaşlaryň jemgyýetde işjeň, çylşyrymly meseleleriň hötdesinden ynamly gelip bilýän, maksada okgunly şahslar bolup ýetişmegine mümkinçilik berýär. Şeýlelikde, matematika dersi diňe bir ylmy bilim däl, eýsem, şahsyýetiň akyl-düşünje taýdan ösmeginiň möhüm güýji bolup çykyş edýär.
Başlangyç synplarda matematika sapaklarynyň mazmunyny döwrebaplaşdyrmak, innowasion usullary ornaşdyrmak we okuwçylaryň döredijilikli zehinini ösdürmek häzirki zaman bilim syýasatynyň ileri tutulýan ugurlarynyň biridir. Matematika arkaly ösýän logiki pikirlenme ukyplary ýaş nesliň geljekde ýokary tehnologiýaly ulgamlarda, sanly ykdysadyýetde we ylmy işlerde üstünlik gazanmagyny üpjün edýän möhüm binýatdyr. Şonuň üçin bu ders okuwçylaryň akyl taýdan ösüşini gazanmakda, Watanymyza dünýä derejesinde beýik üstünlik gazanjak zehinli, paýhasly nesilleri taýýar etmekde aýratyn möhüm orny eýeleýär.
Jumaýewa Gülkamar Rahmetowna,
Lebap welaýatynyň Çärjew etrabynyň 20-nji orta mekdebiniň matematika mugallymy
