Türkmenistanyň Bilim Ministriniň 2024-nji ýylyň 9-njy dekabrynda çykaran 392 belgili buýrugy bilen (Bilim ministriniň 2019-njy ýylyň 29-njy martynda çykaran 80 belgili buýrugy bilen tassyklanan) daşary ýurt döwletlerinde berlen ýokary we orta hünär bilimi hakyndaky resminamalary Türkmenistanda ykrar etmegiň Tertibini ulanmak boýunça Gözükdirijä üýtgetmeler we goşmaça girizildi.
Bu buýruk Türkmenistanda daşary ýurt diplomlaryny ykrar etmegiň tertibine düýpli üýtgeşmeler girizýär.
Esasy üýtgeşmeler uçurymlaryň iki görnüşine degişlidir:
“Hukuk Işi” ugrunda täze tertip
«Hukuk işi» hünäriniň aýratynlyklaryny göz öňünde tutup, daşary ýurt döwletlerinde «hukuk işi» ugry boýunça Türkmenistanyň raýatlaryna berlen ýokary hünär bilimi hakyndaky resminamalary Türkmenistanda ykrar etmek üçin 3 aý möhletli tölegli okuw geçiler. Onuň meýilnamasyny Türkmenistanyň Bilim ministirligi bilen Adalat ministrligi bilelikde tassyklar.
Daşary ýurt döwletiniň hünär bilimi edarasyna okuwa girip, adatdan daşary ýagdaý sebäpli elektron okuwy we uzak aralykly bilim tehnologiýalaryny ulanmak arkaly dowam edip alnan Resminamanyň eýesiniň sowatlylygy elektron okuwy we uzak aralykly bilim tehnologiýalaryny ulanmak boýunça barlanar.
«Hukuk işi» ugry boýunça berlen ýokary hünär bilimi hakyndaky resminamalaryň Türkmenistanda ykrar edilmegi üçin ýüz tutýan Türkmenistanyň raýatlaryndan synaglary kabul etmek üçin düzüminde aşakdakylaryň wekilleri bolan ýörite Döwlet synag topary dörediler:
- Türkmenistanyň Ýokary kazyýeti
- Türkmenistanyň Baş prokuraturasy
- Türkmenistanyň Adalat ministrligi
- Türkmenistanyň Milli howpsuzlyk ministrligi
- Türkmenistanyň Içeri işler ministrligi
- Magtymguly adyndaky Türkmen döwlet uniwersiteti
- Türkmenistanyň Daşary işler ministrliginiň Halkara gatnaşyklary instituty
- Halkara ynsanperwer ylymlary we ösüş uniwersiteti
Täze tertipleriň amaly netijesi
Türkmenistanyň Bilim ministrliginiň bu täze düzgünnamalary daşary ýurt bilim resminamalarynyň Türkmenistanda has adalatly we täsirli ykrar edilmegine ýol açýar. Bu düzgünnamalar ýurdumyzyň hünär derejesini ýokarlandyrmak bilen birlikde, halkara hyzmatdaşlygyň ösdürilmegine hem goşant goşar. Şeýle hem, bellenen tertipde ýurdumyzyň jemgyýetçilik dersleri boýunça döwlet synaglary arkaly raýatlaryň bilim derejesiniň kämilleşdirilmegi üçin oňyn mümkinçilikler döredilýär.
Täze düzgünnamalar esasynda resminamalaryň ykrar edilişi bilen bagly maglumatlar bilen gyzyklanan raýatlar Türkmenistanyň Bilim ministrliginiň resmi web sahypasyndan we degişli bilim edaralaryndan maglumat alyp bilerler.
Buýrugyň we beýleki üýtgeşmeleriň doly görnüşini www.minjust.gov.tm web saýtyndan tapyp bilersiňiz.
