Radikal täzelenen Hyundai Tucson gelýär — dizel motory ýok, emma güýçli gibrid bilen. Hyundai Tucson 2027 hakynda jikme-jik maglumatlar peýda boldy. Ol bütinleý täze Pleos Connect medya ulgamyny alar.
Hyundai kompaniýasy özüniň iň meşhur krossoweri bolan Tucson modeliniň täze neslini çykarmaga taýýarlanýar. «Carscoops» neşiriniň habar bermegine görä, 2027-nji ýylda bazara çykjak täze model has “agras” (brutal) görnüşe eýe bolar we diňe gibrid güýç ulgamlary bilen hödürlener. Dizel hereketlendirijisi bolsa önümçilikden doly aýrylar.
Täze model häzirki wagtda NX5 indeksi bilen mälimdir. Onuň dizaýny geçen ýyl görkezilen «Crater» konsept-karyna esaslanyp, häzirki model bilen deňeşdirilende, çyzyklary has takyk we burçlak bolar. Öňki aýna diregleriniň (stoýkalaryň) dizaýny «Range Rover» stillerini ýatladýar. Relýefli kapot, üýtgedilen yzky aýna şekilleri we pikselli çyralar ulagyň döwrebaplygyny artdyrar.
Täze Tucson bilen bilelikde Pleos Connect operasion ulgamynyň täze nesli hem tanyşdyrylar. Ulgam ses kömekçisi we emeli aň funksiýalary bilen enjamlaşdyrylar. Transmissiýanyň selektory (tizlik geçiriş tutawajy) merkezi konsoldan rul sütünine geçiriler. Bu bolsa öňdäki oturgyçlaryň arasyndaky giňişligi has-da artdyrar.
Ähli multimedia dolandyryşy merkezi planşetde jemlener. Ulagyň hereketlendirijiler sanawynda diňe gibrid (HEV) we torda zarýad alýan gibrid (PHEV) görnüşleri bolar. 1,6 litrlik motor we diňe elektrik energiýasy bilen takmynan 100 km ýol geçmäge ukyply akkumulýator bilen üpjün ediler.
Geljekde has güýçli «N» wersiýasynyň çykmagyna hem garaşylýar.
Täze Hyundai Tucson-yň ilkinji görkezilişi şu ýylyň ahyryna çenli bolar we ol bazarda Toyota RAV4, Honda CR-V, Kia Sportage we Volkswagen Tiguan ýaly güýçli bäsdeşler bilen bäsleşer.
