2025-nji ýylda Tesla kompaniýasy öz taryhynda ilkinji gezek umumy ýyllyk girdejisiniň 3% peselendigini hasaba aldy, öndürijiniň çärýekleýin hasabat resminamalaryna görä, ol 94,8 milliard dollara barabar boldy.
Awtoulag segmentindäki oňyn däl dinamikanyň (girdejiler 10% peselip, 69,5 mlrd dollara düşdi) energetika ugrunyň we hyzmatlar edarasynyň görkezijileriniň ösmegi netijesinde bölekleýin öwezi dolundy.
Hut şonuň üçin hem, habar berşimiz ýaly, kompaniýa indiki çärýegiň ahyryna çenli Kaliforniýadaky zawodynda Model S we Model X modellerini öndürmegi bes etmegi meýilleşdirýär. Geçen ýyl bu elektromobilleriň iberilişi 40% peselip, 50 850 birlik boldy.
Islegiň azalmagy bilen baglylykda, ýolbaşçylar biznesiň mundan beýläkki ösüşini «fiziki emeli aň», şol sanda awtopilot we «Optimus» robotlary bilen baglanyşdyrýar. Ozal habar berlişi ýaly, robotlar şu ýylyň ahyrynda Frimontdaky kärhanada ýygnalyp başlanar.
Kompaniýanyň ýolbaşçysy Ilon Mask köne modellerden ýüz öwürmegiň sebäbini gysgaça bir söz bilen düşündirdi: «Awtonomlyk».
Dördünji çärýekde elektromobil üpjünçiliginiň umumy 16% peselendigine garamazdan, kompaniýanyň umumy girdeji normasy 16,3%-den 20,1%-e çenli ýokarlandy. Şeýle hem resminamalarda markanyň tutuş taryhynda 9 million öndürilen awtomobil sepgidine ýetilendigi bellenilýär.
