Google-yň esasy kompaniýasy bolan Alphabet dünýäde bazar gymmaty 4 trillion dollardan geçen dördünji kompaniýa boldy. Kompaniýanyň bu üstünligi emeli aň tehnologiýalarynyň ösmegi bilen baglanyşyklydyr.
Alphabet amerikan holdinginiň bazar bahasy taryhda ilkinji gezek 4 trillion dollar görkezijiden geçdi. Kompaniýa dünýäde bu bazar gymmatyna ýeten dördünji korporasiýa boldy. Mundan öň şeýle derejä diňe Nvidia, Microsoft we Apple ýetipdi.
Alphabet (GOOG) holdinginiň C klasly paýnamalary duşenbe güni söwdalarda 1,6% gymmatlap, her paýnama üçin rekord derejä — 334,44 dollara ýetdi. Kotirowkalaryň bu ösüşi, ilkinji nobatda, emeli aňyň täze Gemini modeliniň işe girizilmegi bilen baglanyşdyrylýar. Bloomberg-iň bellemegine görä, maýadarlar Alphabet-i emeli aň (EA) bazaryndaky ösüşiň esasy hereketlendirijisi hökmünde görýärler.
Söwdalaryň dowamynda paýnamalar birneme peselip, bazar bahasy wagtlaýynça 4 trillion dollardan aşak düşen hem bolsa, soňra täzeden ösüşe geçdi. Alphabet häzirki wagtda dünýäniň iň gymmatly kompaniýalarynyň sanawynda ikinji orny eýeleýär. Kompaniýanyň kapitallaşmasy 2025-nji ýylyň sentýabrynda 3 trillion dollardan geçipdi. CNBC-niň hasaplamalaryna görä, Alphabet bu sepgide Google-yň biržada paýnamalaryny ýerleşdireninden (IPO) takmynan 20 ýyl soň we holdingiň döredilmeginden on ýyl gowrak wagt geçenden soň ýetdi.
2026-njy ýylyň 13-nji ýanwaryndaky (irdenki ýagdaýa görä) dünýäniň iň gymmat 5 kompaniýasy:
- Nvidia — 4,48 trillion dollar;
- Alphabet — 4,01 trillion dollar;
- Apple — 3,83 trillion dollar;
- Microsoft — 3,55 trillion dollar;
- Amazon — 2,63 trillion dollar.
“Kompaniýanyň bäsdeşlik artykmaçlyklary diňe bir saklanyp galman, eýsem has-da berkeýär. Başga hiç bir oýunçyda emeli aňda üstünlik gazanmak üçin zerur bolan modeller, hasaplaýyş kuwwaty, programmalar we maglumatlar toplumy ýok” — diýip, Janus Henderson Investors kompaniýasynyň seljerijisi Diwýaunş Diwatiýa belleýär.
