Apple kompaniýasy dünýäde işjeň ulanylýan smartfonlaryň sany boýunça birinji orny eýeledi. Counterpoint Research barlag kompaniýasynyň maglumatyna görä, häzirki wagtda planetada ulanylýan ähli smartfonlaryň, takmynan 25 göterimi iPhone smartfonlarynyň paýyna düşýär. Bu ähli öndürijileriň arasyndaky iň ýokary görkezijidir. Onuň iň ýakyn bäsdeşi bolan Samsung bolsa 20 göterime ýeter-ýetmez paý bilen ondan yza galýar.
2025-nji ýylyň netijelerine görä, Apple we Samsung bilelikde dünýädäki işjeň smartfonlaryň 44 göterimine gözegçilik edýärler. Bu iki kompaniýa işjeň enjamlarynyň sanyny 1 milliarddan aşyrmagy başaran ýeke-täk öndürijilerdir. Beýleki brendler ulanyjy binýadynyň ölçegi boýunça olardan ep-esli yzda barýar.
Köp ulanylýan smartfonlaryň sany boýunça iň iri öndürijileriň hataryna Xiaomi, Oppo, Vivo, Transsion Group, Huawei, Honor, Motorola, Realme we Google hem girýär. Bu sanawyň ahyryndaky üç brendiň her biriniň işjeň enjamlarynyň sanynyň 200 milliondan hem azdygyny aýtmak gerek.
Barlagda aýratyn bellenilişi ýaly, bahasy 600 dollardan ýokary bolan smartfonlaryň kategoriýasynda diňe Apple we Samsung hökmürowanlyk edýär. Beýleki öndürijileriň bu baha aralygyndaky bazarda agramly paýy ýok.
Counterpoint Research kompaniýasynyň bu maglumatlary satylan däl-de, eýsem häzirki wagtda eýeleri tarapyndan ulanylyp ýörlen enjamlaryň sanyny öz içine alýar.
