Android ulgamy üçin Telegramyň 12.4 wersiýasy doly täzelenen interfeýs bilen çykdy. AndroidInsider.ru neşiriniň belleýşi ýaly, goşundynyň daşky görnüşi düýpli özgerdilip, ozal iPhone wersiýasynda ulanylan «Liquid Glass» stiline eýe boldy.
iOS üçin bu täzelenme 2025-nji ýylyň oktýabrynda, Telegram-yň iOS 26-nyň bezegine görä sazlanan wagty çykypdy. Indi bolsa şeýle dizaýn Android ulanyjylaryna hem hödürlendi. Goşundy açylanda ulanyjylar öňküsi ýaly çatlaryň, kanallaryň we botlaryň sanawyny görýär, ýöne ekranyň aşaky böleginde «Çatlar», «Kontaktlar», «Sazlamalar» we «Profil» bölümlerine çalt girmäge mümkinçilik berýän nawigasiýa paneli peýda boldy.
Ekranyň ýokarky çep burçundaky üç çyzykly düwme aýryldy. Onuň deregine üç nokatly düwme ulanylýar; bu düwme arkaly gündizki ýa-da gijeki temany üýtgedip, «Halanýanlar» (Избранное) we «Gapjyk» (Кошелек) bölümlerine geçip ýa-da topar döredip bolýar. Bezegde gök reňk azalyp, ak reňk agdyklyk edip başlady. Interfeýsiň elementleri tegelek görnüşe eýe boldy, sazlamalar bölümi bolsa reňkli nyşanjyklar bilen aňladyldy.
Ulanyjynyň profili hem açyk reňkler bilen bezeldi, şol bir wagtyň özünde Telegram Premium ulanyjylary başga reňkleri saýlap biler.
Android üçin Telegram 12.4 eýýäm Google Play-de we işläp düzüjiniň saýtynda elýeterlidir. Köne interfeýse dolanmak üçin goşundynyň öňki wersiýasyny gurnamaly bolar, emma täze funksiýalar diňe iň soňky täzelenmelerde işleýär.
