Toyota Motor Corporation 2026-njy ýyldan başlap ýapon bazarynda ABŞ-da öndürilen üç modeli — Camry sedany, Highlander ulagy we Tundra pikapy satyp başlamagy meýilleşdirýär. Bu barada ýapon kompaniýasynyň metbugat gullugy habar berdi.
Toyota bu awtomobilleriň çykmagynyň dürli kategoriýadaky alyjylaryň isleglerini kanagatlandyrmaga mümkinçilik berjekdigini, şeýle-de Ýaponiýa bilen ABŞ-nyň arasyndaky söwda gatnaşyklarynyň ösüşine goşant goşjakdygyny belleýär. Üpjünçiligi ýola goýmaga taýýarlanmak üçin kompaniýa ikitaraplaýyn gepleşikleriň netijesinde Ýaponiýanyň Ýer, infrastruktura, ulag we syýahatçylyk ministrligi tarapyndan göz öňünde tutulan täze ulgamy ulanmagy meýilleşdirýär.
Camry rahat salony, ýiti dizaýny we ýokary ýangyç tygşytlylygy bolan biznes sedan hökmünde häsiýetlendirilýär. Bu model dünýä bazarynda köp wagtdan bäri elýeterli we ABŞ-da hem iň köp satylýan modelleriň biri bolmagynda galýar. Model Türkmenistanda-da örän meşhur. Geň ýeri, Ýaponiýanyň özünde bu model islegiň pesligi sebäpli 2023-nji ýyldan bäri satylmaýar.
Highlander – maşgalaly alyjylar üçin niýetlenen ýolsuz ýerden hereket edip bilýän üç hatarly ulag. Ol şäher we ondan daşary gezelençler üçin laýyk gelýän giň salony we köpugurly hereketi hödürleýär. Bu model Ýaponiýada 2007-nji ýyla çenli satyldy we Toyota Kluger diýlip atlandyryldy. Kompaniýa Awstraliýada we Ýaponiýada Highlander adyny ulanyp bilmedi, çünki ol ýerde bu söwda markasy Hyundai Terracan SUV-a degişli.
Tundra pikapy ýokary kuwwaty, tirkeg mümkinçilikleri we ygtybarlylygy bilen tapawutlanýar. Kompaniýa tebigatda dynç alşa islegiň artýandygy sebäpli, bu modeliň Ýaponiýada hem öz alyjylaryny tapjakdygyna ynanýar.
Şol bir wagtyň özünde, awtomobilleriň Ýaponiýanyň bazaryna nähili görnüşde iberiljekdigi aýdyňlaşdyrylmaýar. Ýurtda awtomobilleriň ruly, esasan, sag tarapda ýerleşdirilýär. ABŞ-da bolsa bu modeller çep rul bilen çykarylýar. Indi Kentukki ştatyndaky zawodda modelleriň sag rully wersiýalary çykarylarmy ýa-da başga çözgüt tapylarmy, bu belli däl.
