Şu gün Türkmenistanyň Prezidenti Serdar Berdimuhamedow sanly ulgam arkaly Ministrler Kabinetiniň nobatdaky mejlisini geçirdi. Onuň dowamynda mübärek Gadyr gijesi mynasybetli iş kesilen raýatlaryň tussaglykdna boşadylmagyna degişli Permana gol çekildi.
“Watan” habarlar gepleşiginde bellenilip geçilişi ýaly, hormatly Prezidentimiz asylly däbe eýerip, jenaýat edendikleri üçin iş kesilen 321 sany raýatyň mübärek Gadyr gijesi mynasybetli günäsini geçmek hakyndaky Permana gol çekdi.
Döwlet Baştutanymyz Türkmenistanyň Prezidentiniň ýanyndaky Raýatlyk we günä geçmek meseleleri boýunça teklipleri taýýarlamak baradaky toparyň başlygy Begenç Gündogdyýewe hukuk goraýjy edaralaryň ýolbaşçylary bilen bilelikde günäsi geçilen adamlary tussaglykdan boşadyp, olaryň ýakyn wagtda öz öýlerine, maşgala agzalarynyň arasyna barar ýaly ähli zerur işleri geçirmegi tabşyrdy.
Türkmenistanyň Prezidenti günäsi geçilen adamlara yhlasly zähmet çekip, ýurtda amala aşyrylýan giň gerimli işlere öz goşantlaryny goşmaklaryny, Türkmenistana ak ýürekden hyzmat edip, halal zähmetiň hözirini görüp ýaşamaklaryny arzuw etdi.
Şu ýylky mübärek Oraza aýynda Gadyr gijesiniň 26-njy martdan 27-nji marta geçilýän gijä deň geljekdigi bellenilýär.
