Häzirki zaman dünýäsi dilleriň we medeniýetleriň biri-biri bilen ýakynlaşýan giňişligine öwrüldi. Döwletleriň arasynda hyzmatdaşlygyň artmagy, bilimiň we tehnologiýanyň çalt ösmegi adamlardan diňe bir hünär başarnygyny däl, eýsem dünýä bilen erkin aragatnaşyk gurup bilýän dil başarnygyny hem talap edýär. Şeýle şertlerde dil adamyň pikirlenişini giňeldýän, ony täze mümkinçiliklere alyp barýan güýçli gural bolup çykyş edýär. Hut şu sebäpli hem iňlis dili häzirki döwrüň diňe bir aragatnaşyk serişdesi däl, eýsem bilime, ösüşe we geljege eltýän möhüm ýol hökmünde aýratyn ähmiýete eýe bolýar.
Iňlis dili bilim ulgamynda aýratyn ähmiýete eýedir. Häzirki wagtda dünýäniň öňdebaryjy ylmy barlaglarynyň, okuw gollanmalarynyň we sanly bilim çeşmeleriniň aglabasy hut şu dilde çap edilýär. Iňlis dilini bilýän ýaşlar halkara bilim giňişligine aralaşyp, dünýä derejesinde bäsleşip bilýän hünärmenler bolup ýetişýärler. Bu bolsa bilimiň hilini ýokarlandyrmaga, täze pikirleri özleşdirmäge we döredijilikli çemeleşmeleri ösdürmäge ýardam berýär.
Hünär durmuşynda hem iňlis diliniň orny örän uludyr. Döwrebap tehnologiýalar, sanly ulgamlar, innowasion önümçilik we halkara hyzmatdaşlyk bilen baglanyşykly ugurlarda bu dil esasy aragatnaşyk serişdesi hökmünde ulanylýar. Iňlis dilini bilmek adama öz hünärini kämilleşdirmäge, daşary ýurt tejribesini öwrenmäge we täze derejelere ýetmäge mümkinçilik döredýär. Şonuň üçin häzirki wagtda bu dil zähmet bazarynda möhüm artykmaçlyk hökmünde kabul edilýär.
Ýaş nesil üçin iňlis dili geljege açylýan giň mümkinçilikleriň nyşanydyr. Ol ýaşlaryň dünýä garaýşyny giňeldýär, olaryň özüne bolan ynamyny artdyrýar hem-de täze maksatlary öňünde goýmagyna itergi berýär. Dil öwrenmek diňe bir grammatik düzgünleri özleşdirmek däl, eýsem başga halklaryň medeniýetini, dünýägaraýşyny we pikirleniş ýörelgelerini tanamakdyr. Bu bolsa ýaşlaryň ruhy taýdan kämilleşmegine, dünýä bilen sazlaşykly ýaşamagyna uly täsir edýär.
Şeýle hem iňlis dili Watanymyzyň halkara giňişlikde tanalmagynda möhüm orun eýeleýär. Türkmen ýaşlarynyň daşary ýurtlarda bilim almagy, halkara çärelerine gatnaşmagy, ylmy we medeni hyzmatdaşlyklarda çykyş etmegi ýurdumyzyň abraýyny has-da belende göterýär.
Äşe Mahmudowa,
Daşoguz şäheriniň 37-nji çagalar bakja bagynyň iňlis dili mugallymy
