Häzirki döwürde mekdebe çenli ýaşdaky çagalaryň ösüşi diňe bir bilim ýa-da terbiýe bilen çäklenmän, onuň şahsyýet hökmünde doly kemala gelmegini üpjün edýän toplumlaýyn çemeleşmäni talap edýär. Bu ulgamda iň möhüm ugurlaryň biri – maşgalanyň we mekdebe çenli bilim edaralarynyň arasyndaky berk we netijeli hyzmatdaşlykdyr. Çünki çaganyň ilkinji durmuş tejribesi maşgalada başlanýar, mekdebe çenli bilim edarasy bolsa bu terbiýäni dowam etdirýän we giňeldýän möhüm jemgyýetçilik guramadyr.
Maşgala çaganyň ilkinji mekdebi bolup, ene-atanyň berýän terbiýesi, görkezýän nusgasy we berýän söýgisi onuň şahsyýetiniň, ahlaklylyk, ynanç we watansöýüjilik ýaly esasy häsiýetleriniň emele gelmeginde esasy täsir edýär. Çaganyň ilkinji durmuş sapaklary – şeýlelik bilen ene-atalary tarapyndan berilýän düzgünler, endikler we duýgudaşlyk çemeleşmeleri – onuň geljekki durmuşyna esas bolup durýar.
Mekdebe çenli ýaşdan başlap, çaganyň sagdyn pikirlenmegi, duýgudaşlygy, sosial gatnaşyklary we döredijilik ukyplary ösdürilýär. Emma bu diňe bir terbiýeçiniň tagallasy bilen çäklenmeýär. Ene-atalaryň hem çaganyň gündelik durmuşynda işjeň gatnaşmagy, onuň terbiýesini utgaşdyrmagy zerurdyr. Mysal üçin, öýde berilýän endikler bilen çagalar bagynda öwredilýän düzgünleriň deň bolmagy, çaganyň aňsat uýgunlaşmagyna we içki ynamynyň artmagyna mümkinçilik berýär. Şeýlelik bilen, ene-ata bilen terbiýeçiniň arasyndaky yzygiderli hyzmatdaşlyk çaganyň emosional we sosial ösüşini hem güýçlendirýär.
Häzirki döwürde ýurdumyzyň döwlet syýasaty hem maşgalanyň we mekdebe çenli bilim edaralarynyň hyzmatdaşlygyny güýçlendirmäge aýratyn üns berýär. Hormatly Prezidentimiziň alyp barýan giň gerimli işleri, çagalaryň sagdyn, bilimli we watansöýüjilik ruhunda terbiýelenmegine gönükdirilen döwlet maksatnamalary, ene-atalary bu prosese işjeň çekýär.
Çagalar bagynda geçirilen ýörite çäreler, ene-atalaryň gatnaşmagynda amala aşyrylýan açyk sapaklar we maslahatlar, çaganyň dürli ukyplaryny ösdürmäge mümkinçilik berýär. Şeýle çäreler, şeýle hem ene-atalaryň çagalaryň gündelik terbiýesine nähili gatnaşmalydygy barada bilimini artdyrýar.
Maşgala bilen çagalar bagynyň netijeli hyzmatdaşlygy çaganyň ähli ugurlarda doly ösüşini üpjün edýär we ýurduň geljegine gönükdirilen giň gerimli syýasatyň bir bölegi bolup hyzmat edýär. Bu hyzmatdaşlyk hem çaganyň şahsyýetini kemala getirýär, hem-de geljekki jemgyýet üçin jogapkärli, bilimli we sagdyn nesliň terbiýelenmegine şert döredýär. Şonuň üçin maşgala bilen çagalar bagynyň arasyndaky sazlaşykly, yzygiderli we netijeli gatnaşyklary ösdürmek, kämilleşdirmek we dowamly taýdan berkitmek häzirki döwürde iň möhüm we zerur wezipelerden biri hasaplanýar.
Ýazan: Gurbandurdyýewa Bagdagül,
Daşoguz şäheriniň 14-nji çagalar bagynyň terbiýeçisi
