Fransuz inženeri Edwin Wan Rýumbeke ganatlaryny işjeň kakmak arkaly guşlaryň uçuşyny gaýtalaýan «Swift» atly ornitopter dronuny tanyşdyrdy. Agramy bary-ýogy 10,9 gram bolan bu robot-guş iOS we Android ulgamlaryndaky ýörite mobil programma arkaly dolandyrylýar.
Taslamany dörediji bu modeli ähli ulanyjylar üçin niýetlenen uniwersal enjam hökmünde öňe sürýär. Enjamyň esasy aýratynlygy — çalt uçuşlar üçin tizlendiriji we haýal, durnukly manýowrlar üçin niýetlenen iki sany çalşyrgyç guýrugynyň bolmagydyr. Gurluşyna laýyklykda ornitopter açyk meýdanda sagatda 31 km tizlik bilen uçup bilýär we edil şonuň ýaly, binalaryň içinde sagatda 3,5 km çenli haýallap bilýär.
Robot-guşuň göwresi polipropilen köpüginden, uglerod çybyklaryndan we titandan ýasalan. Enjam bir gezek zarýad berlende 10–12 minut uçmaga ukyply bolup, dolandyryş aralygy 150 metre çenli ýetýär. Mobil programma her bir guýruk üçin bäş sany uçuş sazlamasyny hödürleýär, şeýle-de has amatly dolandyrmak üçin «X-Play» atly ýörite joýstik aksessuaryny hem ulanmak bolýar. Drony eldenem, ýerdenem uçuryp bolýar.
Enjamyň bölekleýin satuwdaky bahasynyň 156 ýewro bolmagyna garaşylýar, Kickstarter arkaly öňünden sargyt edýänler üçin bolsa baha 109 ýewro çenli düşüriler. Ilkinji önümleri eýelerine sentýabr aýynda gowşurmak meýilleşdirilýär.
