Apple kompaniýasy 2011-nji ýyldan bäri ilkinji gezek 2025-nji ýylda ýyllyk global smartfon satuwy boýunça Samsungdan öňe geçip biler. Bu barada vedomosti.ru internet neşiri Counterpoint Research kompaniýasynyň çaklamalaryna salgylanyp habar berdi.
Bilermenler, bu uly ösüşi iPhone 17 hatarynyň üstünlikli bolmagy we pandemiýadan soň smartfonlaryň işjeň ýagdaýda täzelenmegi bilen baglanyşdyrýar.
Maglumatlara görä, 2025-nji ýylda Apple bazara 243 million töweregi iPhone, Samsung bolsa, takmynan, 235 million smartfon iberer. Apple kompaniýasynyň dünýä bazaryndaky paýy 19,4%, Samsung kompaniýasynyňky 18,7% bolar. Üpjünçilik satuw bilen deň bolmasa-da, olar kompaniýanyň garaşylýan islege görä önümçilik meýilnamalaryny görkezýär.
Üstünligiň esasy sebäbi sentýabrda iPhone 17 smartfonlarynyň çykmagy boldy, ol kompaniýanyň baýramçylyk döwründe güýçli satuwyny üpjün etdi. ABŞ-da täze hatara bolan isleg ilkinji dört hepdede geçen ýylky hatardan 12% ýokary, Hytaýda bolsa 18% ýokary boldy. Analitikler pandemiýa döwründe smartfon satyn alan köp ulanyjylaryň häzir täze modellere geçýändigini belleýär, bu hem satuwy ep-esli ýokarlandyrýar.
Hasabat maglumatlaryna görä, Samsung elýeterli we orta gurluşlaryň segmentinde hytaý brendleri tarapyndan bäsdeşligiň güýçlenmegi bilen ýüzbe-ýüz bolýar, bu hem onuň öňdebaryjy bolmagyny kynlaşdyrýar.
Counterpoint Apple kompaniýasynyň azyndan 2029-njy ýyla çenli birinji orny saklajakdygyny çaklaýar. Muňa ulanylan iPhone smartfonlarynyň bazary-da ýardam edýär: 2023-nji ýyldan 2025-nji ýylyň ikinji çärýegi aralygynda şeýle smartfonlardan 358 mln sanysy satyldy. Şol sebäpli smartfon eýeleriniň köpüsiniň täze modellere geçmegine garaşylýar.
Şeýle-de, bilermenler kompaniýanyň hyzmat we funksiýa ekoulgamyny giňeltmegiň hasabyna öz ornuny berkidýändigini belleýär. Kompaniýanyň 2026-njy ýyl üçin meýilnamalarynda arzan iPhone 17 smartfonyny we ilkinji eplenýän smartfony çykarmak bar. 2027-nji ýyla meýilleşdirilen uly dizaýn täzelenmesi we Siriniň kämilleşdirilen wersiýasy hem onuň ornuny has berkider.
