Paýtagtymyzda geçirilen «Ýaş inžener — 2026» atly intellektual bäsleşik ýurt boýunça iki ýüze golaý ýaş zehini bir ýere jemledi. Türkmenistanyň Senagatçylar we telekeçiler partiýasynyň Aşgabat şäher komiteti, Bilim ministrliginiň Aşgabat şäher Baş bilim müdirligi hem-de Magtymguly adyndaky Ýaşlar guramasynyň Aşgabat şäher geňeşi tarapyndan guralan bu çäre ýaşlaryň inženerçilik we innowasiýa ukyplaryny ýüze çykarmaga giň mümkinçilik döretdi. Bu barada “Ýaş tebigatçy” jemgyýetçilik guramasynyň resmi saýtynda beýan edilýär.
«Ojar Aziýa» hususy kärhanasynyň binasynda geçirilen bäsleşigiň çäklerinde 7–12-nji synp okuwçylary «Akylly önümçilik-hyzmat tehnologiýalary» ugry boýunça özleriniň täzeçil taslamalaryny görkezdiler. Taslamalaryň hatarynda aýratyn ünsi çeken işleriň biri hem Aşgabat şäheriniň dil dersleri çuňlaşdyrylyp öwredilýän ýöriteleşdirilen 97-nji orta mekdebiniň okuwçylary tarapyndan taýýarlanan «Ýagyş suwuny süzüji ulgam» atly taslama boldy. Bu iş tebigat bilen gündelik durmuşymyzyň sazlaşygyny döretmäge gönükdirilip, suw serişdelerini tygşytly ulanmagyň döwrebap çözgüdini hödürleýär.
Mekdebiň 11-nji synp okuwçysy Rejepowa Nurana
«Bu taslama ýagyş suwunyň ýygnalmagyny, süzülmegini we gözegçilikli usulda gaýtadan ulanylmagyny üpjün edýär. Bu çemeleşme suwuň tygşytly sarp edilmegini we jogapkärçilikli dolandyrylmagyny höweslendirýär»
– diýip, gürrüň berdi.
Onuň synpdaşy Ogulnabat Mahtumowanyň düşündirmegine görä, ulgamyň gurluşy tebigatyň baýlyklaryny ýitgisiz ulanyp, gündelik durmuşyň hajatlaryna doly gönükdirmäge mümkinçilik berýär. Ýaşlar bu taslamany diňe bir türkmen dilinde däl, eýsem, iňlis dilinde hem taýýarlap, geljekde halkara bäsleşiklerine hödürlemegi meýilleşdirýärler.
Bäsleşigiň beýleki ugurlary boýunça hem gyzykly pursatlar köp boldy. «Robot tehnikasy» ugrunda robotlar ýöriteleşdirilen synaglardan geçdiler, «Erjeller kodlaýar» bäsleşiginde bolsa 8-nji synp we ondan uly okuwçylar «Scratch» programmirleme dilinde taýýarlan oýunlaryny we amaly programmaly taslamalaryny görkezdiler. Bäsleşigiň çäklerinde geçirilen «BattleBots» — robotlaryň söweşi bolsa gatnaşyjylarda aýratyn täsir galdyrdy. Ýaryş ýeňijilere sowgatlaryň we Hormat hatlarynyň dabaraly ýagdaýda gowşurylmagy bilen tamamlandy.
Ýaş inženerleriň hödürlän bu täzeçil çözgütleri tehnologiýanyň diňe bir ösüş däl, eýsem tebigat bilen ylalaşykly ýaşamagyň esasy guralyna öwrülýändiginiň aýdyň beýany boldy.
