Düýbi Los-Anjelesde ýerleşýän «CheerDots» emeli intellektli ilkinji «akylly» kompýuter syçanjygy bilen tanyşdyrdy. Bu barada «hi-tech.mail.ru» web saýtynda habar berildi.
Enjam «Cheerdots 2» diýlip atlandyryldy. Miniatýura enjamy iki bölege bölünýär. Şolaryň biri magnitli berkidiji bolsa, beýlekisi, sensor panelli esasy bölekdir. Adaty syçanjyk hökmünde hem ulanyp bolýan tehnologiýa diktofonyň hem-de lazer görkezijisiniň mümkinçiliklerini-de ýerine ýetirýär.
«Cheerdots 2» syçanjygynyň esasy aýratynlygy hem oňa «ChatGPT» mümkinçiliginiň ýardamy bilen baglydyr. Şeýlelikde, ol uly mümkinçiliklere eýelik eder. Mysal üçin, syçanjygyň üsti bilen umumy sapakda berilýän maglumatlary ýa-da geçirilýän gepleşikleri ýazyp bolar. Emeli aň sesi düşnükli tekste öwürýär we kompýutere geçirýär. Maglumatlaryň ählisi «Bluetooth» ýa-da «Wi-Fi» boýunça geçirilýär.
Mundan başga-da, emeli aň syçanjygy ýazylan teksti ýa-da sesi başga dillere terjime edip, bellik edip, ýatlatmalar döredip we söhbetdeşlikden ýa-da leksiýadan möhüm zatlary belläp biler. Awtorlaryň bellemegine görä, «Cheerdots 2» öwrenýänler, nutuk bilen çykyş edýänler hem-de maglumatlary belläp alýanlar üçin diýseň ajaýyp enjam bolup durýar.
Öndüriji bir batareýa kuwwatynda 20 günden gowrak wagta uzajak batareýa güýjüni kepillendirýär.
