Dubaý – Boston Consulting Group — BCG tarapyndan ilkinji gezek taýýarlanan Intelligent Cities Index 2026 halkara reýtinginde dünýä boýunça ikinji orny eýeledi. Barlagda 39 ýurtdan 61 iri şäheriň emeli aňy, sanly tehnologiýalary we şäher dolandyryşynyň döwrebap usullaryny ýaşaýjylaryň hem-de işewürligiň bähbidine nähili ulanýandygy seljerildi. Reýtingde birinji orny London eýelese, Dubaýdan soň Nýu-Ýork, Waşington we Amsterdam ýerleşdi.
Dubaý tehnologiýalary ulanmakda birinji boldy
BCG şäherleriň ösüşini bäş esasy ugur boýunça bahalandyrdy: ýaşaýjylar üçin netijeler, strategiýa, tehnologiýalaryň ulanylyşy, dolandyryş usullary we ösüş üçin şertler.
Dubaý umumy reýtingde ikinji orny eýelemek bilen birlikde, adoption — sanly we AI çözgütleriniň amalda ulanylmagy kategoriýasynda dünýäde birinji boldy. BCG-niň maglumatyna görä, şäher köp sanly «akylly şäher» hyzmatlaryny durmuşa geçirýär we emeli aňy döwlet hyzmatlarynda hem-de gündelik şäher infrastrukturasynyň işinde giňden ulanýar.
BCG-niň ilkinji bäşligi şu görnüşde boldy:
- London — 1-nji orun;
- Dubaý — 2-nji orun;
- Nýu-Ýork — 3-nji orun;
- Waşington — 4-nji orun;
- Amsterdam — 5-nji orun.
Reýting 35 görkeziji boýunça taýýarlanyldy
Intelligent Cities Index diňe bir şäherde näçe täze tehnologiýanyň bardygyny ölçemeýär. BCG metodologiýasynda 5 ugur, 14 ölçeg we 35 görkeziji ulanyldy.
Şäherler ilkinji nobatda ykdysady ähmiýeti we «akylly şäher» ösüşindäki ornuna görä saýlandy. Soňra sanly strategiýanyň hili, emeli aňyň we beýleki tehnologiýalaryň ulanylyşy, hyzmatlaryň netijeliligi, dolandyryş modeli hem-de tehnologik ekosistemany ösdürýän infrastruktura ýaly görkezijiler deňeşdirildi.
BCG-niň netijelerine görä, diňe güýçli sanly infrastruktura eýe bolmak ýeterlik däl. AI we sanly hyzmatlaryň ýaşaýjylar tarapyndan işjeň ulanylmagy olaryň hyzmatlardan kanagatlanmagyna we şäheriň umumy tehnologik ösüşine hem täsir edýär.
AI şäher hyzmatlarynyň möhüm bölegine öwrülýär
BCG Dubaýyň üstünliginiň aýratyn-da täze tehnologiýalary amaly taýdan giň gerimde ornaşdyrmak bilen baglydygyny belleýär. Şäherde emeli aň we sanly hyzmatlar döwlet dolandyryşyndan başlap, ýaşaýjylara hyzmat etmek we işewürlik proseslerine çenli dürli ugurlarda ulanylýar.
BCG-niň Intelligent Cities Index 2026 barlagy emeli aňyň diňe tehnologiýa merkezleri hasaplanýan şäherlerde däl, dünýäniň dürli sebitlerinde şäher hyzmatlaryny ösdürmegiň möhüm guralyna öwrülýändigini hem görkezdi.
Şeýlelikde, Dubaýyň dünýä reýtingindäki ikinji orny şäheriň diňe sanly infrastruktura maýa goýmagy bilen däl, eýsem şol tehnologiýalary gündelik hyzmatlarda işjeň ulanmagy bilen hem baglanyşyklydyr.
