Alymlar termoýadro plazmasynyň modelirlemesini müňlerçe esse çaltlandyrmaga ukyply bolan emeli aň (EA) esasyndaky guraly tanyşdyrdylar. GyroSwin ulgamy Beýik Britaniýanyň Atomyň energiýasy boýunça müdirliginiň (UKAEA), Linssdäki Iogann Kepler uniwersitetiniň we Emmi AI kompaniýasynyň hünärmenleri tarapyndan işlenip düzüldi.
Termoýadro energetikasy arassa we çäksiz diýen ýaly energiýa çeşmesi hökmünde görülýär, emma onuň ösmegine Günüňkiden hem ýokary temperaturalara çenli gyzdyrylan plazmany dolandyrmagyň çylşyrymlylygy päsgel berýär. Magnit meýdanlary bu gurşawy saklamaly, ýöne plazmanyň içindäki turbulentlik (tertipsiz akym) energiýanyň ýitirilmegine sebäp bolup bilýär.
Mundan ozal şeýle prosesler ägirt uly hasaplaýyş serişdelerini we wagty talap edýän bäş ölçegli girokinetik modelleriň kömegi bilen hasaplanylýardy. Täze GyroSwin ulgamy bu modelleri seljermek üçin maşyn öwrenişini ulanýar we öwredilenden soň, plazmanyň esasy fiziki aýratynlyklaryny saklap, netijeleri bary-ýogy birnäçe sekundyň içinde berýär.
UKAEA edarasy GyroSwin ulgamyny Beýik Britaniýanyň STEP tokamagy ýaly täze nesil termoyadro desgalarynyň taslamalarynda ulanmagy göz öňünde tutýar.
