Hytaýyň Hubeý welaýatynyň Szinmen şäherinde täze tehnologiýa synagdan geçirildi. AVIC korporasiýasynyň Aýratyn ulag serişdeleri gözleg instituty tarapyndan işlenip düzülen ilkinji elektrikli dirižabl bolan «AS700D» üstünlikli uçuryldy.Dirižabl litiý-ion akkumulýatorlar bilen işleýär. Onuň hereketlendiriji ulgamy elektrikli hereketlendirijilere esaslanýar. Şonuň üçin hem ol hiç hili diýen ýaly ses çykarmaýar we ýylylyk bölüp çykaryp yz galdyrmaýar – bu aýratynlyk ony adaty gaz turbinaly ýa-da porşenli hereketlendirijiler bilen işleýän ulgamlardan tapawutlandyrýar.Synag wagtynda dirižabl dik göterildi, 50 metr beýiklige çykdy we bir salym howada üznüksiz durdy. Ondan soň bolsa ýuwaşlyk bilen ýere gondy.
Synaglaryň dowamynda elektrikli hereketlendirijili ulgamyň durnuklydygy we ygtybarly işleýändigi tassyklanyldy. Şeýle hem propeller ulgamynyň we çekiş ugruny dolandyrmak tehnologiýasynyň netijeliligi subut edildi.Synag uçuşynyň uçarmany Lin Hun «AS700D» bilen uçmagy şeýle düşündirdi: «elektrikli awtoulag süreniň ýaly, uçmak ýeňil we birsydyrgyn bolýar». Bu bolsa dirižablyň dolandyrylyşynyň rahatdygyny we ýolagçy gatnatmak üçin amatlydygyny görkezýär.
Onuň içine uçarman bilen bilelikde jemi 10 adam sygýar.«AS700D» dürli wezipeleri ýerine ýetirmek üçin niýetlenendir. Ony howadan gözegçilik we syn işleri üçin ulanmak bolar. Şeýle hem howpsuzlygy üpjün etmek, desgalary goramak, tebigy ýagdaýlary gözegçilikde saklamak we zerur halatlarda adamlary göçürmek üçin hem ulanyp bolar. Dirižablyň iň ýokary uçuş belentligi 3100 metre, tizligi bolsa sagatda 80 kilometre ýetýär.
Türkmen oba hojalyk instituty
4-nji ýyl talyby Serdarowa Gurbanaý
