Häzirki wagtda dünýäniň ähli ýurtlarynda oba hojalygynda ýokary netijeliligi gazanmak, ekologiýa taýdan arassa önüm öndürmek we azyk howpsuzlygyny üpjün etmek möhüm meseleleriň biri bolup durýar. Şu ugurda ýurdumyzda hem oba hojalygyna häzirki zaman innowasion tehnologiýalary giňden ornaşdyrmak boýunça uly işler alnyp barylýar.
Tehnologiýanyň ösmegi netijesinde oba hojalygynda öňki usullardan düýpgöter tapawutly täze iş usullary peýda boldy. Mysal üçin, suwaryş ulgamynda sanly tehnologiýalaryň ulanylmagy netijesinde ýerleriň suw bilen üpjünçiligi has netijeli gurulýar. Damjalaýyn suwaryş ulgamlary suw tygşytlamakda we hasyllylygy ýokarlandyrmakda möhüm ähmiýete eýedir.
Şeýle hem häzirki döwürde oba hojalygynda dronlaryň we emeli aň (AI) ulgamlarynyň giňden peýdalanylmagy öňdebaryjy ýörelgeler hökmünde garalýar. Dronlaryň kömegi bilen ekin meýdanlarynyň ýagdaýy yzygiderli gözegçilikde saklanýar, zyýan berijilere garşy göreş çäreleri geçirilýär. Emeli aň esasly maglumat ulgamlary bolsa ekinleriň ösüşi, howa şertleriniň täsiri we mineral dökünleriň ulanylyşy boýunça takyk seljerme berýär.
Ýyladyşhana hojalygynda döwrebap tehnologiýalaryň ulanylmagy hem uly üstünlikleri berýär. Ýylylgy tygşytlaýjy, ýagtylandyryjy we awtomatlaşdyrylan howa dolandyryş ulgamlary netijesinde ýylylykda ösdürilýän önümleriň möçberi artýar, hiliniň gowulanmagy üpjün edilýär.
Ýurdumyzda oba hojalygynda täze tehnologiýalaryň giňden ulanylmagy diňe bir önümçiligiň netijeliligini ýokarlandyrman, eýsem azyk howpsuzlygyny üpjün etmäge, ýerli önümleriň dünýä bazarynda bäsdeşlige ukyply bolmagyna hem ýardam berýär.
Oba hojalygynda täze üýtgeşmeler bilen baglanyşykly tehnologiýalaryň ornaşdyrylmagy ýurdumyzyň ykdysadyýetiniň durnukly ösüşine, ilatyň azyk bilen ygtybarly üpjünçiligine hem-de ekologik taýdan arassa önümçiligi ösdürmäge mümkinçilik döredýär. Innowasiýa ýoluny saýlamak oba hojalygynyň geljegi üçin iň ygtybarly we täsirli ugry görkezýär.
Babajanowa Gülşeker,
Türkmen oba hojalyk institutynyň Weterinar lukmançylygy fakultetiniň Maglumat ulgamlary we tehnologiýalary (oba hojalygynda) taýýarlyk ugrunyň 4-nji ýyl talyby
