Mercedes-Benz Sprinter furgonynyň täze neslini adaty bolmadyk görnüşde tanyşdyrdy. Kompaniýa adaty suratlaryň ýerine furgonyň şekilleri çykyp duran äpet harsaň daşa meňzeýän «The Boulder» atly heýkeli görkezdi.
Heýkeliň ölçegleri: uzynlygy 6,5 metr, ini – 2,5 metr we beýikligi – 2,75 metr. Eger bu görnüş hakyky ululyk hökmünde kabul edilse (kompaniýa muny gönüden-göni tassyklanok), onda geljekki modeliň gabaralary barada takmynan netije çykarmak bolýar.
Mercedes-Benz täze Sprinter-iň dürli uzynlykda, teker bazasynda we agram bahalarynda, şeýle hem ýolagçy wersiýalarynda we bort platformaly görnüşinde elýeterli boljakdygyny mälim etdi.
Heýkeliň sypaty we käbir aýratynlyklary boýunça, täze nesilde yzky diwaryň has dik, kapotynyň bolsa häzirki modellen deňeşdirilende has tekizdigini çaklamak bolýar. Radiator gözeneginiň şekili bolsa GLC elektrik krossowerinde ulanylýan dizaýna ýakyndyr.
Indiki nesil Sprinter iki platformada çykarylar: elektrik modelleri üçin Van.EA, içinden ýandyrylýan hereketlendirijili wersiýalar üçin bolsa Van.CA. Mundan başga-da, täze MB.OS operasion ulgamynyň hasabyna model hatary sanly tehnologiýalar we birikdirilen hyzmatlar boýunça has ösen bolar.
Mercedes-Benz sentýabryň ahyrynda önümçilikden öňki VLE elektrowenleriniň ýygnalyp başlandygyny mälim edipdi. Bu modeliň doly tanyşdyrylyşy indiki ýylyň birinji ýarymynda meýilleşdirilýär. Täze Sprinter bolsa, öňki çaklamalara görä, biraz soňrak görkeziler.
