Meta kompaniýasy ulanyjylar üçin goşmaça mümkinçilikleri bolan Instagram Plus atly täze tölegli hyzmatyny synagdan geçirip başlady. Bu hyzmata abuna ýazylmak baradaky ilkinji maglumatlar Filippinler we Meksika ýaly käbir ýurtlaryň mobil goşundylarynda peýda boldy.
Mälim bolan maglumatlar
Skrinşotlardan alnan maglumatlara görä, bu hyzmat Stories (Hekaýalar) bölümi üçin giňişleýin mümkinçilikleri hödürleýär. Olaryň arasynda — hekaýalary 24 sagatdan köp möhlet bilen paýlaşmak, auditoriýa üçin birnäçe aýratyn sanawlary döretmek, şeýle hem tomaşaçylaryň jikme-jik statistikasyna elýeterlilik bar. Hususan-da, ulanyjylar Hekaýalaryna kimleriň gaýtadan seredendigini görüp bilerler we tomaşaçylaryň sanawyndan anyk bir adamy gözläp bilerler.
Şeýle hem, funksiýalaryň arasynda Stories (Hekaýalar) bölümini öňünden görmek, “highlight” döretmek we “super hearts” (super ýürejikler) görnüşindäki täze reaksiýalar agzalýar.
Meta kompaniýasy bu synaglaryň geçirilýändigini tassyklady we bu funksiýanyň diňe birnäçe ýurtda hem-de ähli ulanyjylar üçin däl-de, çäkli adamlar üçin elýeterlidigini belledi. Kompaniýa, şeýle hem, hekaýalary tomaşaçylaryň sanawynda görünmezden gizlin görmek mümkinçiliginiň “öňünden görmek” (preview) tertibi arkaly işleýändigini, hekaýalaryň möhletini bolsa ýene 24 sagat uzaldyp bolýandygyny aýdyňlaşdyrdy.
Abunanyň bahasy synag tapgyrynda sebite görä aýda takmynan $1–2 aralygynda bolup durýar. Şeýle-de bolsa, ulanyjylara mugt synag möhleti hem hödürlenilýär.
