Hytaýyň Midea Group kompaniýasy senagat awtomatizasiýasy üçin özüniň “Miro U” atly täsin robotyny tanyşdyrdy. Robot alty manipulýator bilen enjamlaşdyrylan hem-de tekerli platformada hereket edýär. Bu mümkinçilik oňa adam fiziologiýasyna mahsus çäklendirmeleri ýeňip geçmäge kömek edýär. Öndürijiler Miro U robotyny manipulýasiýa boýunça netijeliligi ýokarlandyrmak üçin döredilen «ýokary derejede adama meňzedilen» robot diýip atlandyrýarlar.
Miro U robotynyň esasy artykmaçlygy onuň köp wezipeli işläp bilmegi hem-de şol bir wagtyň özünde birnäçe amallary ýerine ýetirip bilmegidir. Goşmaça el ulgamynyň kömegi bilen robot birnäçe işi bir wagtda ýerine ýetirip bilýär, şol bir wagtyň özünde aşaky elleri arkaly ýükleri saklap bilýär. Alty elli gurluş iş guralynyň çalşylmagyna gönükdirilen amallary hem ep-esli çaltlandyrýar.
Midea Group kompanisýasynyň hasaplamalaryna görä, käbir önümçilik amallarynda Miro U adaty usullara garanyňda netijeliligi 30% ýokarlandyrmaly.
Miro U robotynyň synag esasynda ulanylyşy şu aýyň ahyrynda Midea Group kompaniýasynyň kir ýuwujy maşynlary ýygnalýan Hytaýdaky kärhanasynda başlanar. Şol bir wagtda kompaniýa ammarlar hem-de dükanlar üçin adam bedenine has meňzeş gurluşly Meila hyzmat robotlaryny hem ösdürýär.
![Pinterest](https://pinterest.com/pin/create/button/?url=https%3A%2F%2Fgorogly.com%2Ftehnologiya%2Fmidea-group-ozunin-miro-u-atly-tasin-robotyny-tanysdyrdy%2F&media=
https://gorogly.com/wp-content/uploads/2025/12/robot.jpg &description=%%title%% Hytaýyň Midea Group kompaniýasy özüniň "Miro U" atly täsin robotyny tanyşdyrdy.){kind=link}