2025-nji ýylyň netijeleri boýunça Nissan kompaniýasy Ýaponiýada soňky 30 ýyldan gowrak wagtda, ýagny 1993-nji ýyldan bäri iň pes satuw derejesini görkezdi. Kompaniýanyň içerki bazardaky paýy ilkinji gezek 10%-den aşak düşdi. Bu barada Ýaponiýanyň Awtoulag dilerleriniň birleşiginiň (JADA) we Ýaponiýanyň Ýeňil awtoulaglar we motosikller birleşiginiň (JLMVMA) maglumatlaryna salgylanýan Nikkei neşiri habar berýär.
Geçen ýyl Ýaponiýada Nissan-yň täze awtoulaglarynyň satuwy 15% peselip, 403 100 sany boldy. Bu görkeziji hatda ýarymgeçirijileriň ýetmezçiligi zerarly bazaryň kyn döwürlerini başyndan geçiren 2022-nji ýyldaky (449 500 awtoulag) netijesinden hem pesdir. Kompaniýanyň bazardaky paýy 9%-e çenli peseldi, netijede Nissan satuw möçberi boýunça Toyota, Suzuki, Honda we Daihatsu ýaly öndürijilerden yza galdy.
Bilermenler bu gowşak netijeleri, ilkinji nobatda, täze modelleriň ýetmezçiligi bilen düşündirýärler. Mysal üçin, kompaniýanyň ýapon bazaryndaky iň meşhur kiçi göwreli (subkompakt) modeli bolan Nissan Note 2021-nji ýyldan bäri düýpli täzelenmedi. Ýanwar-noýabr aýlary aralygynda oňa bolan isleg geçen ýylyň degişli döwri bilen deňeşdirilende 20% azaldy.
Mundan başga-da, brendiň abraýynyň peselmegi goşmaça faktor hökmünde görkezilýär. Soňky ýyllarda kompaniýa köpçülige aýan bolan maliýe we beýleki kynçylyklar bilen ýüzbe-ýüz boldy, bu bolsa öz gezeginde müşderileriň garaýyşlaryna oňsyz täsir etdi.
Noýabr aýynda Nissan Ýaponiýada mart aýynyň aýagynda tamamlanýan 2025-nji maliýe ýyly üçin satuw çaklamasyna täzeden seretdi. Garaşylýan möçber 15 000 awtoulag azaldylyp, 445 000 sany diýlip bellenildi. Aprel-dekabr aýlaryny öz içine alýan üç çärýegiň dowamynda kompaniýa takmynan 270 000 awtoulag satdy, bu bolsa meýilleşdirilen görkezijiniň takmynan 61%-ini düzýär.
