2030-njy ýyllarda Nýu-Ýork bilen Tokionyň aralygynda bir sagatlyk kosmos uçuşlaryny ýola goýmak meýilleşdirilýär.
Ýaponiýanyň Nippon Travel agentligi syýahatçylyk pudagynda hakyky öwrülişik döretmäge taýýarlanýar. Maglumata görä, kompaniýa 2030-njy ýyllarda Nýu-Ýork bilen Tokionyň aralygynda kosmos uçuşlaryny ýola goýmagy meýilleşdirýär. Bu uçuşlar diňe bir sagat dowam eder. Ýolagçylar ummanyň üsti bilen uzak wagtlyk ýadawlyk dörediji uçuşlaryň ýerine stratosfera çykyp, günortanlyk nahary wagtynda planetanyň ýarysyny geçip, filmi tamamlamazdan ozal dünýäniň beýleki künjegine gonup bilerler.
Nýu-Ýork — Tokio kosmos gatnawy
Ýaponiýanyň The Mainichi gazetiniň habaryna görä, Nippon Travel geljegiň eýýäm başlanandygyny subut etmegi maksat edinýär.
Kompaniýa Innovative Space Carrier Inc. atly startap bilen hyzmatdaşlykda Ýerdäki şäherleriň arasynda kosmos uçuşlaryny amala aşyrmagy meýilleşdirýär.
Uçaryň wezipesini ýerine ýetirjek enjam — gaýtadan ulanylýan raketa, ol ýolagçylary Nýu-Ýork şäherinden Tokio şäherine bary-ýogy bir sagatda eltmäge ukyply bolar. Uçuşlar ummandaky ýörite suw üstü platformalardan başlar. Eger ähli zat meýilnama boýunça gitse, birnäçe ýyldan “howa menzilindäki gijikme” diýen düşünje düýbünden unudylar.
Kosmos gatnawynyň bahasy
Gitmek hem gelmek üçin iki tarapa alnan petegiň bahasy, takmynan, 657 müň amerikan dollar bolar.
Bu, elbetde, kiçi öýüň bahasyna deň, ýöne planetanyň ýarysyny pizza bişýänçä geçmek isleýänler üçin bu teklip örän gyzykly bolup biler.
Taslamanyň döredijileriň aýtmagyna görä, esasy maksat — Ýer ýüzüniň iki nokadynyň arasynda adamlary 60 minutda gatnatmak mümkinçiligini döretmeklikdir.
Jikme-jik maglumatlar entek doly aýan edilmeýär, ýöne deslapky hasaba alynmagyň 2026-njy ýylda başlanmagyna garaşylýar. Şeýle hem kompaniýa müşderilere kosmos syýahatynyň aýratynlyklaryny kem-kemden tanyşdyrmak üçin kosmosda ulanylýan azyk tagamlaryny dadyp görmek, ýerüsti tehnologiýa desgalaryna gezelençler ýaly kabir maksatnamalary hem hödürlejekdigini aýdýar. Belki, geljekde raketa uçuşlary häzirki uçarlarda uçmak ýaly adaty bir zat bolup galar, diňe penjireden görünýän görnüş has täsirli bolar.
