OpenAI kompaniýasy özüniň emeli aň bilen işleýän enjamlarynyň ilkinji prototiplerini taýýarlady. Bu barada kompaniýanyň baş direktory Sem Altman Apple kompaniýasynyň öňki baş dizaýneri Joni Aýw hem-de merhum baş direktory Stiw Jobsuň aýaly Loren Pauell Jobs bilen söhbetdeşlikde mälim etdi diýip, news.rambler.ru internet neşiri habar berýär.
Enjamyň jikme-jiklik maglumatlary häzirlikçe gizlin saklanýar, ýöne Altmanyň sözlerine görä, enjam “adamyň bir wagt pikir eden, okan ýa-da aýdan ähli zatlaryny biler”. Ýönekeý we ykjam enjamyň iki ýylyň içinde bazara çykmagyna garaşylýar.
Maý aýynda OpenAI Joni Aýwyň emeli aň bilen işleýän enjamlary işläp düzmekde ýöriteleşen başlangyjy io-ny 6,4 milliard dollara satyn aldy. Joni Aýw täze enjamlary işläp düzmek prosesiniň öňünden çaklap bolmaýandygyny, ýöne iki ýylyň içinde önümi çykarmagy umyt edýändigini belledi.
Sem Altman enjamy ulanmagyň täsirini “has rahat atmosfera” hökmünde häsiýetlendirdi. Ol: “Özüňi daglyk ýerde ýerleşýän iň owadan kölüň boýundaky öýde oturyp, ümsümlikden we asudalykdan lezzet alýan ýaly duýýarsyň” diýip belledi.
Onuň sözlerine görä, enjam ulanyjynyň etmeli wezipelerini ýerine ýetirip, maglumatlary süzüp, eýesine haçan we näme barada habar berilmelidigine düşünip biler.
