Awtoulag öndürijisi, elektron kagyzy ulanyp döredilen prototip awtoulagyny görkezdi. BMW geljekdäki sanly awtoulag üçin gözýetimini Las Wegasda sarp ediji elektronika sergisinde (CES) açdy. BMW i Vision Dee prototipi, akylly “ýoldaş” we korpusynyň reňkini çalt üýtgetmek ukyby bolan orta ölçegli sedandyr. Kompaniýanyň inženerleri çeýe ulagyň reňkini dolandyrmak üçin elektron kagyz
tehnologiýasyny işläp düzdiler. “EPaper” plýonkasy 32 sany dürli reňk görkezip biler. Korpus 240 segmente bölünýär. Olaryň hersi aýratyn “displeý” bilen örtülendir we beýlekilerden garaşsyz üýtgedilip bilner. Bu, çäksiz mukdarda şablon döretmäge we olary birnäçe sekundyň içinde üýtgetmäge mümkinçilik berýär. BMW ýagty korpusdan başga-da, öňki aýnanyň tutuş ýüzüni ullakan ekrana öwürýän täze giňeldilen hakyky ulgamyny döretdi. Dolandyryş panelindäki ölçeýjileri ulanyp, sürüjiler baş ekranda näçe sanly mazmuny görmek isleýändiklerini düzüp bilerler. Olar sürüjilik maglumatlary we ykjam enjam maglumatlaryndan başlap, doly wirtual hakykat tejribelerine çenli maglumatlary öz içine alýar. Bu täzeligiň 2025-nji ýyldan başlap, awtoulag öndürijisiniň ösdürjek geljekki elektrik ulaglary bolan NEUE KLASSE modellerinde elýeterli boljakdygy bellendi. “BMW i Vision Dee”-iň bort ulgamy özboluşly “sanly emosional tejribe” döretmek üçin işlenip düzüldi. Model diňe bir tebigy gürleýişe düşünmän, eýsem “ýoldaş” awataryny proýektirlemek bilen şatlyk, geň galdyryjylyk we makullamak ýaly dürli duýgulary beýan edip bilýän sanly kömekçi bilen enjamlaşdyrylandyr. Şeýlelik bilen, maşyny akylly ýoldaşa öwürmek üçin sanlylaşdyrmagyň doly mümkinçiligi ulanylyp bilner.
Gülsoltan KURBANBAÝEWA,
Türkmen oba hojalyk institutynyň talyby
