Meksikanyň Gwadalupe şäheriniň häkimiýetleri BBVA stadionynda howpsuzlyk ulgamynyň bir bölegi boljak dört sany it şekilli roboty görkezdi. Bu stadion 2026-njy ýylyň futbol boýunça dünýä çempionatynyň oýunlaryny kabul etjek ýurtdaky üç desganyň biridir diýip, Wired neşiri habar berýär.
K9-X bölümi çalt jogap bermek toparynyň wezipelerini ýerine ýetirer. Bu it şekilli robotlar ýaraglanmadyk, ýöne wideokameralar, gijeki görüş enjamlary we uzak aralykdan duýduryş bermek üçin ulanylýan aragatnaşyk ulgamlary bilen enjamlaşdyrylandyr. Olar bikanun hereketleriň öňüni almaga, adatdan daşary ýagdaýlary ýüze çykarmaga, şübheli zatlary anyklamaga, märekä gözegçilik etmäge we zerur bolanda hukuk goraýjy edaralary habardar etmäge kömek eder.
Robotlar ýarym awtonom tertipde işleýär, olar özbaşdak netijä gelmeýär we hatda özbaşdak hereket hem etmeýär. Olar operator tarapyndan dolandyrylýar. «K9-X robot itleri wideo materiallary bermek we jemgyýetçilik howpsuzlygy güýçleri girmezden ozal ýokary töwekgelçilikli ýerlere girmek bilen ilkinji gatyşmalarda polisiýa goldaw berer. Robotlar uruş-dawalaryň ýa-da serhoş adamlaryň peýda bolan ýagdaýlarynda işe gatyşyp, işgärleriň fiziki howpsuzlygyny gorar» diýip, şäheriň häkimi Ektor Garsiýa metbugat maslahatynda aýtdy.
K9-X otrýady eýýäm «Monterreý» futbol klubunyň yklym ligasynyň soňky oýnunda synagdan geçirildi we şonda olar BBVA stadionynda patrul gullugyny ýerine ýetirdi. Dünýä çempionatynyň dowamynda robot itlerden başga-da, öňdebaryjy uçarmansyz uçuş enjamlary we olara garşy göreşiji serişdeler ulanylar. Häkimiýetler K9-X robotlarynyň modelini, öndürijisini we tehniki aýratynlyklaryny mälim etmedi. BBVA stadionynda jemi dört oýun geçiriler: olaryň üçüsi toparlaýyn tapgyrda we biri 1/16 finalda bolar.
