Günorta Koreýanyň tehnologiýa ägirdi bolan Samsung, dünýäde we ýurdumyzda innowasion önümleri bilen hemişe üns merkezinde bolmagy başarýan markalaryň biridir. Bu innowasion önümleriň başynda bolsa, şübhesiz, eplenýän akylly telefonlar durýar. Kompaniýanyň 2019-njy ýylda bazara çykaran ilkinji eplenýän enjamyndan soňra, pudakda hakyky bir öwrülişik başlandy. Indi bolsa firma, bütinleý täze — üçe eplenýän akylly telefon taslamasy bilen ulanyjylary we bäsdeşlerini ýene bir gezek haýran galdyrmaga taýýarlanýar.
Täze tehnologiýa ulanyjylara nämeleri hödürlär?
Pudagyň öňdebaryjy seljerijileriniň (analitikleriniň) çaklamalaryna görä, kompaniýa ýakyn wagtda soňky nesil “Galaxy Z Fold” we “Flip” enjamlary bilen bir hatarda, üç gezek eplenip bilinýän täze akylly telefonyny hem köpçülige tanyşdyrar. Aslynda bu gürrüňler täze däl; öndürijiniň 2020-nji ýylda üçe eplenýän ekranlar bilen baglanyşykly käbir patentleri alandygy we olar boýunça ylmy-barlag işlerini alyp barýandygy mälimdi. Öňki alynan patentlere we meşhur dizaýnerleriň taýýarlan görsellerine (render) esaslananyňda, täze telefon üçe eplenmek üçin iki sany aýratyn menteşä (çatryga) eýe bolar.
Bu iki menteşe arkaly bölünýän üç ekran bölegi, enjama hiç hili daşarky goşmaça ekranyň zerurlygyny galdyrmaýar. Şeýlelikde, ulanyjylar ýeke-täk ekran arkaly hem adaty akylly telefon, hem-de giňişleýin planşet formadaky enjamy ulanmak mümkinçiligine eýe bolarlar.
Kompaniýanyň bu innowasion ädimi, eplenýän ekranly enjamlaryň bazaryndaky bäsleşigi bütinleý täze we has ýokary basgançaga çykarýar. Ýeke-täk ekranda hem telefon, hem-de planşet tejribesini jemleýän bu tehnologiýa, geljegiň ykjam aragatnaşyk standartlaryny kesgitlejek esasy görkeziji bolar.
