Emeli aň (EA) pudagyndaky ýokary ösüş we maglumatlar merkezlerini gurmak boýunça güýçli bäsleşik netijesinde dünýä bazarynda ýat çipleriniň ýetmezçiligi dürli görnüşli ýat çipleriniň bahalarynyň ep-esli ýokarlanmagyna sebäp boldy. Dünýä boýunça iň uly ýat çiplerini öndüriji Samsung Electronics kompaniýasy noýabr aýynda käbir önümleriniň bahalaryny sentýabr aýyna garanyňda 60% çenli ýokarlandyrdy.
Bahalaryň ep-esli ýokarlanmagy ýöriteleşdirilen EA çiplerine we olarda ulanylýan DDR5 ýaly ýat çiplerine bolan güýçli islegi artdyrýar. Mundan başga-da, bahalaryň ýokarlanmagy, maglumatlar infrastrukturasyny ösdürýän uly kompaniýalara maliýe basyşynyň güýçlenmegine hem-de smartfonlar, kompýuterler we dürli sarp ediş elektronika enjamlary ýaly soňky model önümleriň bahalarynyň ýokarlanmagyna sebäp bolup biler. Mysal üçin, Samsung Electronics kompaniýasynyň 32 GB DDR5 ýat çipi üçin şertnamalaýyn bahasy noýabr aýynda sentýabr aýyndaky 149 dollardan 239 dollara çenli ýokarlandy. 16GB DDR5 we 128GB DDR5 çipleriniň bahalary hem 50% ýokarlanyp, degişlilikde 135 dollara we 1,194 dollara barabar boldy.
Bahalaryň şeýle ýokary derejede ýokarlanmagy diňe bir emeli aň infrastrukurasyny ösdürýän kompaniýalara däl, eýsem smartfonlar, notebooklar we dürli sarp ediş elektronikasyny öndürijilere hem düýpli täsir eder. Bu ýagdaý täzelikde satyşa çykaryljak soňky model önümleriň bahalarynyň ýokarlanmagyna hem sebäp bolup biler.
Samsung Electronics kompaniýasy tarapyndan heniz bahanyň ýokarlandyrylmagy barada resmi habar berilmedi. Ýöne, pudak bilermenleri bu kararyň emeli aň bazarynyň orta we uzak möhletli ösüş mümkinçilikleri bilen baglanyşyklydygyny aýdýarlar. Hut şu nukdaýnazardan, kompaniýanyň Günorta Koreýada täze ýokary öndürijilikli çip önümçilik toplumyny işe girizmegi meýilleşdirýändigi hem mälimdir.
Pudak bilermenleri Samsung Electronics kompaniýasynyň 2025-nji ýylyň dördünji çärýegine çenli ýat çipleri üçin şertnamalaýyn bahalary ýene-de 40-50 göterim ýokarlandyryp biljekdigini çaklaýarlar. Bu bolsa, garaşylýan umumy bazar bahasyndan takmynan 30 göterim ýokary bolar, diýlip çaklanylýar.
Begenç Şaltaýew,
Türkmen oba hojalyk institutynyň
weterinar lukmançylygy fakultetiniň
oba hojalygynyň ykdysadyýeti we dolandyrylyşy
taýýarlyk ugrunyň 2-nji ýyl talyby.
