Hytaýyň Sinhua uniwersitetiniň alymlary bary-ýogy 0,6 sekundyň içinde ýokary takyklyk bilen çylşyrymly jisimleri döretmäge mümkinçilik berýän 3D-çap tehnologiýasyny işläp düzdüler. Onuň iň kiçi bölekleri 12 mikrometre ýetýär. Bu bolsa saçyň taryndan hem takmynan bäş esse inçe diýmekdir.
Adaty “gatma-gat” çap etme usulyndan tapawutlykda, täze DISH (Digital Incoherent Synthesis of Holographic light fields) usuly golografik şöhle meýdanlaryny ulanýar. Bu usul desganyň tutuş göwresini fotopolimer şepbiginiň içinde şol bir wagtyň özünde emele getirýär. Bu tizligiň syry — ýokary tizlikli aýlanýan periskopda bolup, ol şöhläni dürli burçlardan ugrukdyrýar we şepbigi aýlamak zerurlygyny aradan aýyrýar.
Tizligi sekuntda 333 kub millimetre, takyklygy 19 mikrometre çenli bolan bu taslama millimetrlik inçe şaýlary sekundyň dörtden bir böleginde çap edip bilýär.
Täze tehnologiýa biomedisinada (dokuma modellerini döretmek), mikrorobototehnikada, çeýe elektronikada hem-de smartfonlaryň kameralarynyň böleklerini öndürmekde täze gözýetimleri açýar. Golografik çap usuly ýokary takyklyklykdaky miniatýur inženerçilik boýunça düşünjeleri düýbünden üýtgedýär.
