Ýaponiýanyň paýtagty Tokioda geçirilen Japan Mobility Show sergisinde Toyota kompaniýasy Corolla atly täzeden işlenip düzülen konsept awtoulagyny görkezdi. Täze modeliň dizaýny hem interýeri häzirki nesilden düýpgöter tapawutlanýar. Öndüriji gönüden-göni tassyklamasa-da, bilermenler bu konseptiň 2027-nji ýylda çykmagyna garaşylýan Corolla awtoulagynyň 13-nji nesliniň habarnamasy bolup biljekdigini belleýärler.
Prototip futuristik görnüşe eýe: kuzowyň burçly çyzyklary, giň gabarasy we giňeldilen yzky ganatlary bar. Dik ýerleşdirilen faralar has uly görünýär, adaty däl bamperler hem-de inçe LED zolaklar modele elektrik awtoulaglaryna mahsus dinamiki görnüş berýär. Daşky görnüşi boýunça awtoulag Toyota-nyň bZ elektrik seriýasyna meňzeýär, ýöne onuň dizaýnynda Lexus konseptleriniň aýratynlyklary hem duýulýar. Toyota bu modeliň dolulygyna elektrikli hem-de gibrid güýç gurluşlary bilen hödürlenjekdigini eýýäm tassyklady.
Awtoulagyň öň tarapy “akula-çekiç” stiliniň döwrebap düşündirilmesinde ýerine ýetirilen: radiator paneliniň ýerine öňdäki bamperde howa çekiji ýerleşdirilipdir, ýene bir şemalladyş kanaly bolsa alyn penjiräniň düýbünden üçege çenli geçýär.
Salonda adaty merkezi multimediýa ekrany ýok — kompakt displeýler diňe sürüjiniň we öňdäki ýolagçynyň öňünde ýerleşýär. Merkezi konsol aýratyn dizaýna eýe: ol transmissiýa selektorly kiçijik postament görnüşinde ýerine ýetirilen we içki giňişligi minimalistik görnüşde saklaýar.
Güýç gurluşynyň häsiýetnamalary barada maglumat entek aýdylmady.
