Türkmenistanda «Türkmenaragatnaşyk» agentliginiň tagallalary bilen aragatnaşygy gowulandyrmak üçin täze sanly tehnologiýalar ornaşdyrylýar. Agentlik ýurduň sanly infrastrukturasyny ösdürmek üçin giň gerimli taslamalary durmuşa geçirip, aragatnaşyk babatda häzirki zaman çözgütlerini işjeň ornaşdyrýar. Bu barada Türkmenistanyň Ministrler Kabinetiniň ýanyndaky Ulag we kommunikasiýalar agentliginiň resmi web sahypasynda habar berildi.
Bu ugurda ähmiýetli ädimleriň biri «Altyn Asyr» ýapyk görnüşli paýdarlar jemgyýetiniň müşderileri üçin E-sim wirtual belgileriniň durmuşa geçirilmegi boldy. E-sim,« Altyn Asyr» ýapyk görnüşli paýdarlar jemgyýetiniň müşderilerine eýýäm tanyş bolan adaty SIM-kartalaryň häzirki zaman alternatiwasy bolup durýar. Bu tehnologiýa fiziki kartany ulanmazdan mobil aragatnaşygy işjeňleşdirmäge mümkinçilik berýär.
E-sim tehnologiýasynyň artykmaçlyklary hökmünde, ony ýitirmek ýa-da zaýalamak mümkinçiliginiň ýoldugy hem-de wirtual belgi arkaly ýokarlandyrylan ygtybarlylygyny, enjamda giňişligiň tygşytlanmagyny, bir enjamda birnäçe belgini ulanmak mümkinçiligini, şeýle hem howpsuzlygyň ýokarlandyrylan derejesini öz içine alýar.
Heniz bu hyzmatdan peýdalanmadyk adamlar üçin Türkmenistanda E-sim-i nädip birikdirmek barada aýdýarys: Pasport bilen TM CELL ofisine barmaly, işjeňleşdirmek üçin QR-kod almaly, internete birigmeli, alnan kody skanirlemeli we enjamyň ekranyndaky gözükdirijileri yzarlamaly. Prosesi başlamazdan öň enjamyň E-sim tehnologiýasy bilen utgaşýandygyna göz ýetirmek möhümdir.
«Türkmenaragatnaşyk» agentligi mobil aragatnaşyk hyzmatlaryny gowulandyrmak we giňeltmek boýunça işini dowam edip, «Altyn Asyr» ýapyk görnüşli paýdarlar jemgyýetiniň müşderilerini aragatnaşygyň amatly we ygtybarly bolmagyny üpjün etmek üçin E-sim-iň artykmaçlyklaryndan has işjeň peýdalanmaga çagyrýar.
