Xiaomi kompaniýasy öz taryhynda fiziki zumly ilkinji akylly telefon enjamyny – Xiaomi 17 Ultra flagman smartfonyny taýýarlaýar. Digital Chat Station insaýderi internet neşiriniň habar bermegine görä, täze smartfon eýýäm Hytaýda iki görnüşde – 2512BPNDAC we 25128PNA1C belgileri bilen şahadatnamalaşdyrmakdan geçdi.
Maglumata görä, modelleriň ikisi-de ultra-giň zolakly aragatnaşygy (UWB) goldaýar. Uly wersiýa aragatnaşygyň ýok ýerinde jaň etmek we habar ibermek üçin goşmaça Tiantong we Beidou hemra ulgamlary bilen hem işläp bilýär.
Xiaomi 17 Ultra-nyň esasy aýratynlygy fiziki zumly kamera bolar. Ol In-Sensor Zoom (ISZ) funksiýaly 50 Mp esasy sensor bilen dürli fokus aralyklary we makro-düşüriş bilen işläp bilýän 200 Mp periskopik teleobýektiwi birleşdirýär. Şeýle kameralar giň dinamiki diapazony we islendik ýagtylykda ýokary aýdyňlygy üpjün edýär.
Smartfon durulygy 2K we täzelenme ýygylygy 120 Gs bolan 6,8 dýuýmlyk tekiz OLED displeýine eýe bolar, onuň işine bolsa bir kristally Snapdragon 8 Elite Gen 5 ulgamy jogap berer. Gurluş IP68 ülňüsi boýunça suwdan we tozandan goragly bolup, simsiz zarýad alşy goldaýar. Ol ýokary sygymly Xiaomi Jinsha River akkumulýatory bilen enjamlaşdyryldy.
Flagmanyň hytaý Täze ýylyndan öň gara, ak we benewşe reňklerde çykmagyna garaşylýar. Esasy wersiýanyň bahasy, takmynan, 6000 ýuan (takmynan, 845 dollar) bolup biler.
Digital Chat Station internet neşiri ozal Xiaomi 15 we Xiaomi 15 Pro barada ilkinji bolup takyk maglumatlary berdi hem-de Realme GT 7 Pro smartfonynyň aýratynlyklaryny we Dimensity 9400 çibiniň ir çykmagyny çaklady.
