9-njy maý… Bu sene diňe bir senenamada gyzyl reňk bilen bellenen baýram däl-de, eýsem, ynsan kalbynyň iň çuň gatlaklaryna ornan, dabaranyň we hasratyň, begenjiň we göz ýaşynyň utgaşan mukaddes günüdir. Bu gün — adamzat taryhynda iň wehimli pajyganyň ýeňlip, ýagtylygyň garaňkylygyň, parahatçylygyň bolsa urşuň üstünden ýeňiş gazanan günüdir.
Edermenligiň we mertebäniň mekdebi
Mundan onlarça ýyl ozal dünýäniň asuda asmanyny gara bulutlar gurşap alanda, türkmen halky hem özüniň merdana ogul-gyzlaryny Watan goragyna ugradypdy. Biziň pederlerimiz diňe bir toprak ugrunda däl, eýsem, geljekki nesilleriň — biziň asuda durmuşymyz, bagtyýar ertirimiz ugrunda janyny orta goýdular.
Gündogar frontyň otly ýollarynda, Stalingrad gury ýerlerinde, Kursk dugasynda we Berliniň bosagasynda görkezilen deňsiz-taýsyz edermenlikler taryhyň altyn sahypalaryna ýazyldy. Türkmen ýigitleriniň batyrlygy, gaýduwsyzlygy we wepadarlygy dillerde sena boldy. Olar ölmeyän ruhuň, sarsmaz erkiň nusgasyna öwrüldiler.
Tylyň gahrymanlary: Görünmeýän front
Ýeňiş diňe bir söweş meýdanlarynda gazanylmady. Tylda galan enelerimiziň, uýalarymyzyň we çagalarymyzyň çeken zähmeti, sabyr-takady hem uly bir gahrymançylykdyr. “Ähli zat Ýeňiş üçin, ähli zat front üçin!” diýen şygar bilen gije-gündiz dyz bükmän zähmet çeken türkmen zenanlary özleriniň iň soňky tylla şaý-seplerini Goranmak gaznasyna tabşyrdylar. Olaryň mähirli elleri bilen dokalan ýyly joraplar, ellikler we ýazylan hatlar esgerlerimize ruhy güýç berdi.
Ýatlama — mukaddeslikdir
Bu gün biz Ýeňiş baýramyny belleýän wagtymyz, aramyzda bar bolan sanlyja weteranlarymyzyň öňünde baş egýäris. Olaryň her biri — janly taryh, edermenligiň nusgasy. Şeýle hem, söweş meýdanlaryndan dolanyp gelmedik, parahatçylyk ugrunda şirin janyny pida eden gahrymanlarymyzy sarsmaz uly hormat bilen ýatlaýarys. Halkyň gahrymanlary ölmeýär, olar biziň kalbymyzda, asuda asmanymyzda we bagtyýar gülkilerimizde ýaşaýarlar.
Parahatçylyk — iň uly baýlyk
Türkmenistan Watanymyz häzirki ajaýyp zamanamyzda — Berkarar döwletiň täze eýýamynyň Galkynyşy döwründe Milli Liderimiz Gahryman Arkadagymyzyň. mertebesi belent hormatly Prezidentimiz Arkadagly Gahryman Serdarymyzyň parasatly ýolbaşçylygynda hemişelik Bitaraplyk ýörelgelerine wepaly bolup, dünýäde parahatçylygyň we dostlugyn tarapdary hökmünde çykyş edýär. Biziň asuda durmuşymyz, gurlup ulanylmaga berilýän ajaýyp binalarymyz, bagtyýar çagalarymyzyň gülküsi — bu şol beýik Ýeňşiň miwesidir.
Kaýumberdi Annadurdyýew,
Mary etrabynyň Bedenterbiýe we sport bölüminiň
sport mekdebiniň Taekwondo boýunça tälimçi mugallymy
