Mukaddes Oraza aýynyň iň keremli we örän sahawatly pursatlarynyň biri bolan mübärek Gadyr gijesiniň ýetip gelmegi her bir ynsan kalbyny aýratyn buýsanja, ruhy joşguna besleýär. Bu mukaddes gije ynsan kalbynyň päklenýän, ýagşy umytlaryň täzeden janlanýan, ruhy dünýäniň nurlanýan aýratyn keremli pursatydyr. Şeýle beýik ähmiýetli mukaddes gijäniň ýetip gelmegi halkymyzyň kalplarynda ýagşy niýetleri, agzybirligi we sahawatlylygy has-da güýçlendirýär.
Şu mübärek pursatdan peýdalanyp, bütin türkmen halkymyzy, Milli Liderimiz Gahryman Arkadagymyzy, hormatly Prezidentimiz Arkadagly Gahryman Serdarymyzy mukaddes Gadyr gijesi mynasybetli tüýs ýürekden gutlaýarys.
Asyrlaryň dowamynda parasatly ata-babalarymyz Gadyr gijesine aýratyn hormat goýup, bu mukaddes gijäni uly sarpa bilen garşy alyp gelipdirler. Bu keremli gijede okalan ýagşy doga-dilegleriň, aýdylan hoş sözleriň, edilen ýagşy işleriň sogabynyň has-da artyk bolýandygyna ynanylýar. Şonuň üçin hem bu gije diňe bir ybadatlaryň ýerine ýetirilýän wagty bolman, eýsem ynsan kalbynyň ýagşylyk bilen baýlaşýan mukaddes pursatydyr.
Gadyr gijesi rehimdarlygyň, sahawatlylygyň, ynsanperwerligiň dabaralanýan gijesidir. Bu mukaddes gijede öýlerde agzaçar sadakalary berilýär, birek-birege ýagşy sözler aýdylýar, ýaşulular tarapyndan ýagşy dilegler edilýär. Şeýle asylly ýol-ýörelgeler halkymyzyň kalbynyň giňligini, onuň ruhy dünýäniň baýlygyny görkezýär.
Mukaddes Oraza aýynyň dowamynda jemgyýetde agzybirlik, jebislik, birek-birege hormat goýmak ýaly ýokary ahlak gymmatlyklary has-da berkidilýär. Gadyr gijesi bolsa şol ruhy gymmatlyklaryň iň ýokary derejede ýüze çykýan pursatlarynyň biridir. Bu gijede adamlaryň kalbynda diňe bir şahsy bagtyýarlyk baradaky arzuwlar däl, eýsem jemgyýetiň parahatçylygy, ýurduň ösüşi baradaky ýagşy niýetler hem jemlenýär.
Ata-babalarymyzyň parasatly ýoluny dowam etdirýän türkmen halky häzirki döwürde hem bu sahawatly däpleri uly hormat bilen dowam etdirýär. Häzirki bagtyýar zamanamyzda — Berkarar döwletimiziň täze eýýamynyň Galkynyşy döwründe, Milli Liderimiz Gahryman Arkadagymyzyň, mertebesi belent hormatly Prezidentimiz Arkadagly Gahryman Serdarymyzyň parasatly ýolbaşçylygynda halkymyzyň milli hem ruhy gymmatlyklaryna aýratyn ähmiýet berilýär. Garaşsyz hem baky Bitarap döwletimizde halkymyzyň müňýyllyklardan gözbaş alyp gelýän ýol-ýörelgeleri täze many-mazmun bilen baýlaşyp, jemgyýetimiziň ruhy ösüşine hyzmat edýär.
Gadyr gijesiniň sahawatly dessurlarynda jemlenen ynsana hormat goýmak, rehimdarlyk, adalatlylyk, hoşniýetlilik ýaly ýokary ahlak gymmatlyklary häzirki döwürde hem jemgyýetimiziň ruhy sütünleriniň biri bolup hyzmat edýär. Şeýle gymmatlyklar jemgyýetde ynamy, dostlugy we agzybirligi pugtalandyrýar. Ruhy taýdan baý jemgyýet bolsa ösüşleriň we üstünlikleriň berk binýadydyr.
Bu mübärek gijede edilen doga-dileglerde diňe bir şahsy arzuwlar däl, eýsem tutuş Watanymyzyň abadançylygy baradaky ýagşy niýetler hem beýan edilýär. Halkymyz eziz Diýarymyzyň mundan beýläk hem gülläp ösmegi, Garaşsyzlygymyzyň we baky Bitaraplygymyzyň ebedi berk bolmagy, il-ýurdumyzyň parahat we bagtyýar durmuşy üçin ýagşy dilegler edýär.
Milli Liderimiz Gahryman Arkadagymyzyň parasatly başlangyçlary bilen ýurdumyzda milli ruhy gymmatlyklarymyzy ösdürmäge aýratyn ähmiýet berilýär. Hormatly Prezidentimiz Arkadagly Gahryman Serdarymyzyň baştutanlygynda bu asylly ýol üstünlikli dowam etdirilýär. Munuň özi halkymyzyň ruhy baýlygynyň, onuň medeni mirasynyň hem-de beýik däpleriniň geljek nesillere ýetirilýändiginiň aýdyň subutnamasydyr.
Gadyr gijesi ynsan kalbyny ýagşylyga çagyrýan, ruhy dünýäni nurlandyrýan mukaddes pursatdyr. Şeýle mukaddes pursatlar halkymyzyň müňýyllyklardan dowam edip gelýän medeniýetiniň, onuň beýik ahlak ýörelgeleriniň aýdyň beýanydyr.
Goý, mukaddes Gadyr gijesiniň sahawatly nury her bir öýe bereket, her bir maşgala ojagyna bagtyýarlyk getirsin! Goý, bu keremli gijede edilen ýagşy dilegler kabul bolup, ýurdumyzyň ösüşleri has-da belent sepgitlere ýetsin! Goý, halkymyzyň agzybirligi, parahatçylygy we abadançylygy hemişe dowam etsin!
Berkarar döwletimiziň täze eýýamynyň Galkynyşy döwründe eşretli durmuşyň hözürini görüp, baky bagtyýar ýaşaýan bütin türkmen halkymyzy, Milli Liderimiz Gahryman Arkadagymyzy, hormatly Prezidentimiz Arkadagly Gahryman Serdarymyzy ýene bir gezek mukaddes Gadyr gijesi bilen tüýs ýürekden gutlaýarys.
Mübärek Gadyr gijesi gutly bolsun!
Gunça Hanlyýewa,
Oguz han etrabynyň Bedenterbiýe we sport
bölüminiň sport mekdebiniň şepagat uýasy.
