Halkymyzyň milli lybaslary öz köküni gadymyýetden alyp gaýdýar. Keşdeçilik türkmen amaly-haşam sungatynyň iň gadymy görnüşleriniň biri bolup, ol zenanlaryň arasynda giňden ýaýrapdyr we keşdeçilik başarnygy eneden gyza geçirilipdir. Keşdeçilik dünýäde iň giňden ýaýran we gadymy sungatlaryň biridir. Türkmen gelin-gyzlary öz çeken keşdeleriniň üsti bilen diňe bir tebigatyň gözelliklerini şekillendirmän, eýsem öz arzuw-isleglerini, ýürek-owazlaryny hem beýan edipdirler. Keşdäni has nepis çykarmak her kime başartmandyr. Onuň ýokary hilli nusgasyny döretmek, diňe ruhy taýdan durnukly, örän inçe duýguly, sabyr-takatly zenanlara başardypdyr. Keşdäniň üsti bilen ony döreden zenanyň häsiýetini hem kesgitläp bilipdirler. Gelin-gyzlaryň arasynda keşde çekmek iňňän inçe iş hasaplanyp, zenanlar oňa «iňňe bilen guýy gazan ýaly» diýip, onuň örän köp zähmet talap edýändigini düşündirýärler. Gelin-gyzlaryň arasynda ussat keşdeçiler derrew tanalypdyr.
Olar zenanlaryň arasynda aýratyn hormata eýe bolupdyr. Häzirki döwürde keşdeçilik sungaty Türkmenistanyň ähli ýerlerinde giňden ýaýran. Olar sungatyň bu görnüşi bilen nusgawy nagyşlary döredýärler.
Marokkoda ÝUNESKO-nyň Maddy däl medeni mirasy gorap saklamak baradaky Hökümetara komitetiniň 17-nji mejlisi geçirilýär. Onuň dowamynda Türkmenistanyň öňe süren «Türkmeniň keşdeçilik sungaty» hödürnamasy goldandy. Ýurdumyzyň hem-de Eýran Yslam Respublikasynyň hödürlemeginde milli keşdeçilik sungatymyz ÝUNESKO-nyň maddy däl medeni mirasynyň sanawyna goşuldy. Gözbaşyny asyrlaryň jümmüşinden alyp gaýdýan türkmeniň keşdeçilik sungatynyň geljekde ÝUNESKO-nyň Adamzadyň maddy däl medeni mirasynyň sanawyna girizilmegi bu senediň dünýä halklarynyň medeniýetiniň bir bölegine öwrülmegini üpjün eder.
Türkmen oba hojalyk institutynyň talyby
