Bahar paslynyň ilkinji günlerinde tebigat özüniň täze lybasyny geýnip, dünýäniň täzelenişini yglan edýär. Edil şu pursatlarda kalplarymyza dolýan aýratyn bir mähir we ýylylyk bar. Bu ýylylyk — mukaddes ene mähriniň, gyz-gelinlerimiziň asyllylygynyň we zenan mertebesiniň nurudyr. 8-nji mart — Halkara zenanlar güni mähriň, gözelligiň we wepadarlygyň dabaralanýan mukaddes baýramydyr.
Zenan diýmek, ilki bilen, ene diýmekdir. Enäniň hüwdüsi bilen başlanýan ynsan ömri onuň dogasy we ak patasy bilen kämilleşýär. Türkmen halky enäni mukaddes saýyp, ony “Käbä” deňäpdir. “Ene süýdi — ak süýt, ene mähri — baky nur” diýen pähimler, zenan kalbynyň nähili belentdigini subut edýär.
Öýüň ýylysy, ojagyň bereketi we maşgalanyň agzybirligi zenan bilen baglydyr. Zenan bar ýerinde tertip-düzgün, şatlyk we asudalyk bar. Ol öýüň söýegidir, durmuşyň iň kämil nusgasydyr.
Gündogaryň beýik akyldarlary we şahyrlary öz eserlerinde zenan gözelligini we akyl-paýhasyny wasp etmekden hiç wagt ýadamandyrlar. Magtymguly Pyragynyň, Mollanepesiň we beýleki nusgawy şahyrlarymyzyň goşgularynda zenan — wepalylygyň, ar-namysyň we nepisligiň tymsalydyr.
Zenan diýmek, sabyr-takatlylygyň we döredijiligiň hem nyşanydyr. Türkmen gelin-gyzlarynyň elinden çykýan meşhur halylarymyz, nepis keşdelerimiz we milli lybaslarymyz — bularyň ählisi zenan ruhunyň çeperçilik dünýäsiniň miwesidir. Olaryň her bir nagyşynda bir ykbal, her bir sapagyna bir mähir bar.
Şu günki günde zenan mertebesi täze many-mazmuna eýe bolýar. “Zenan diýmek — bagtdyr” diýenimizde, biz diňe bir maşgala däl, eýsem bütin döwletiň, jemgyýetiň bagtyýarlygyny göz öňünde tutýarys.
Türkmenistanda zenanlaryň hukuklary we bähbitleri döwlet tarapyndan ýokary derejede goralýar. Zenanlaryň jemgyýetçilik-syýasy durmuşa işjeň gatnaşmagy, döwlet dolandyryşynda jogapkärli wezipeleri eýelemegi — ýurdumyzyň demokratik we ynsanperwer ýörelgeleriniň subutnamasydyr. Häzirki wagtda türkmen zenanlary ylymda täze açyşlary edýärler, bilim ulgamynda kämil nesilleri terbiýeleýärler, saglygy goraýyş ulgamynda adam ömrüne hossar çykýarlar. Zenan telekeçilerimiz ýurdumyzyň ykdysady kuwwatyny artdyrmaga uly goşant goşýarlar.
Zenan kalby hemişe bahardyr. Onuň ýylgyryşy dünýäni nurlandyrýar, mähirli sözi bolsa göwünleri galkyndyrýar. Zenan bagtly bolsa — maşgala bagtly, maşgala bagtly bolsa — döwlet hem bagtlydyr.
Arslan Ataýew,
Mary şäheriniň 8-nji sport mekdebiniň
waleýbol boýunça tälimçi mugallymy.
